Delphine, a uman di u be taki fi en aini a artikel a fesi, be e diingi duungu fu feegete den booko-ede fi en. Beibel á taki sama á mu diingi sopi, ma a taki: „Yu á mu diingi win pasa maiki” (Odo 23:20). A diingi di sama e diingi sopi pasa peesi e tyai sikin gi den. Den nai poi libi bun anga den famii efuso taa sama. A omen miliyun sama di e diingi sopi pasa peesi e dede ala yali. Ma den sani ya ná abi fu miti den efu den wooko anga san Beibel taki.

Delphine wooko anga san Beibel taki. A taki: „Mi be kon si taki sopi á be e puu den booko-ede fu mi. Mi wooko anga san sikiifi a Filipisama 4:6, 7. Ape sikiifi taki: ’Wi á mu booko wi ede anga nawan sani, ma taigi Gadu ala sani te wi e begi.’ Neti te mi be e fii enke den booko-ede be e moo mi, mi be e begi Yehofa. Mi be e taigi en fa mi e fii, da mi be e begi en fu a yeepi mi fu pakisei den bun sani fu a libi. Mamanten mi be e meke moiti fu mi á fii so moo. A sani ya yeepi mi fu pakisei san mi abi, pe fu mi pakisei san mi ná abi. Mi paamisi miseefi taki mi ná o diingi sopi moo. Mi be e fii bun tuutuu. A sani ya be e bigi gi mi, neen meke noiti mi be wani du wan sani di be o meke mi lasi a fii ya.”

A sani ya a wan fu den moo gaan sani di e meke sama tyali efuso fii booko. Ma Beibel e yeepi u fu a sani ya á miti u. Ai soi u wantu fu den sani di e meke sama libi a wan fasi di á fiti. Wan fu den sani ya na a poolo di sama e poolo gi taawan sondee taki den wani de anga en. Wan taa sani na a luku di sama e luku sekisi felon anga buku. Wan man di den e kai Samuel taki: „Te fu mi denki mi poolo gi uman. Son leisi a ná wani mi wani de anga en, ma te mi si taki a lobi mi, da ai switi fu poolo gi en.” A omen leisi sama be e taigi Samuweli taki ai poolo gi uman winsi fa a á be e poolo gi den. Neen meke a be teke en enke wan modo fu poolo gi uman. Ma a libi ya be e fooseli en. A taki: „A ná be wan bun sani, bika anga sama fii mi be e pee.”

Samuel leisi wan artikel di e taki fu yonkuu sama a jw.org. Neen a sidon denki san sikiifi a Odo 20:11. Ape sikiifi taki: „A den sani di wan pikin e du, e meke sama sabi sama neen. Den e sabi efu ai du bun. Den e sabi efu ai du sani anga wan kiin ati tu.” Fa a sani ya yeepi en? Samuel be kon fusutan taki a á bun fu pee anga taawan fii. I nai du sani anga wan kiin ati tu te yu e du a sani ya. A taki: „Mi kon fusutan taki wan yonkuu sama di e pee anga taawan fii, ná o poi de wan bun man efuso wan bun uman te a toow. Mi be bigin pakisei fa mi libi be o de te mi toow. Fa mi uman be o fii efu a si taki mi e poolo gi wan taa uman? Mi kon fusutan taki a sani ya a ná wan lawlaw sani. A ná fu di a á taanga, da dati wani taki a bun.” Samuel kengi a fasi fa a be e libi. A sani ya yeepi en fu a á didon anga wan sama di a á toow anga en.

A polobelema fu Antonio be moo bigi. A hii dei a be e luku sekisi felon anga buku. A á be poi tapu anga a sani ya, winsi fa a be toow anga wan uman di a lobi. A taki a sani di sikiifi a 1 Peitilisi 5:8 yeepi en tuutuu. Ape sikiifi taki: „U mu de anga u kiin fusutan. U mu de na ain. A feyanti fu u di den e kai Didibii, e waka lontu enke wan lew di e bali. Ai suku sama fu gwili.” Antonio taki: „Ala peesi pe i go yu e si fowtow di e soi uman soso sikin. Den sani ya nai komoto a yu ede. A tekisi ya yeepi mi fu sidon denki sama na a sama di e tesi u na a sowtu fasi ya. Te mi be si den fowtow ya, mi be e holi a pakisei taki a Didibii wani koli mi. Now mi e fusutan taki a Yehofa wawan poi yeepi mi fu ’de anga kiin fusutan’. Neen poi yeepi mi fu ’de na ain’ tu. A sani ya e yeepi mi fu puu den sani ya a mi ede anga mi ati. A o yeepi mi fu mi toowlibi waka bun tu.” Antonio fende a yeepi di a be abi fanowdu. A fika a takuu gwenti ya. Neen meke moo gaan sani á miti en.

U si kiin taki den leli fu Beibel e yeepi u fu son sani á miti u. Ma a poi yeepi u fu losi polobelema tu? Meke u luku fa a Wowtu fu Gadu sa yeepi u.