Rosie taki: „A hii dei mi be e booko mi ede taki den polobelema di mi be abi o kon moo ogii.” Sowtu Beibeltekisi yeepi en? Wan fu den a Mateyesi 6:34. Ape sikiifi taki: „Ná booko yu ede anga a taa dei, bika a taa dei seefi abi en booko-ede. Ibii dei abi en booko-ede.” Rosie taki a sani di Yesesi taki ya yeepi en fu a á booko en ede anga san o pasa tamaa. A taki: „Den polobelema fu mi be ipi kaba. A á be de fanowdu fu meke den kon moo ipi fu di mi e sidon pakisei sani di á pasa ete. Kande noiti den sani ya o pasa tu.”

Yasmine be e fii enke den booko-ede fi en e moo en. A taki: „Son dei mi be e kee. Neti mi á be e poi siibi. Mi be e fii enke den booko-ede fu mi o kii mi.” Sowtu tekisi yeepi en? A taki a 1 Peitilisi 5:7 yeepi en. Ape sikiifi taki: „Fika ala den polobelema fi i gi [Gadu], bika ai booko en ede anga i.” Yasmine taki: „Mi be e begi Yehofa naamo, da mi be e si fa ai piki den begi fu mi. Mi be e fii enke a puu wan ibi a mi sikoo. Son leisi mi e booko mi ede ete. Ma mi sabi san mi mu du te mi e fii so.”

Wan yonkuu uman di den e kai Isabella taki: „Nda á be e du sani na a yuu di a mu du en. Kande neen meke miseefi e fika sani te enke a lasiti yuu. Mi be e poti den sani di mi mu du a wan se, fu boo pikinso efuso luku tv. A gwenti ya á bun, bika ai meke yu e booko yu ede. I ná o du i wooko bun tu.” Wan tekisi di yeepi en a 2 Timotiyesi 2:15. Ape sikiifi taki: „Du san i poi fu tyai iseefi enke wan sama di bun gi Gadu, wan wookoman di ná abi fu sen gi nawan sani.” Isabella taki: „Mi á be wani sen kisi Yehofa te a si a lesiman wooko di mi du fu di mi feti du en na a lasiti yuu.” Nownow ai du sani taa fasi.

Wan taa yonkuu uman di den e kai Kelsey taki: „Te mi be mu du wan wooko, na a lasiti yuu mi be e feti du en. Mi be e kee son yuu. Son leisi mi be e lasi siibi. Mi ede be e simpan tu.” Gadu yeepi Kelsey anga san sikiifi a Odo 13:16. Ape sikiifi taki: „Wan sama di abi fusutan e du sani anga koni, ma wan sama di ná abi fusutan o meke ala sama si taki a don.” A tekisi ya yeepi Kelsey. A taki: „Wan koni sama e meke wan sikeima fa o du en wooko. Nownow mi meke wan sikeima poti a mi tafaa tapu di e soi sowtu wooko mi mu du, anga on ten mi mu du en. A sani ya yeepi mi fu mi á fika sani te enke a lasiti yuu.”

Wan uman di den e kai Kirsten taki: „Mi man gwe fika mi anga den fo yonkuu pikin fu u.” A tekisi fu Odo 17:17 yeepi en. Ape sikiifi taki: „Wan tuutuu mati o lobi i ala yuu. A de enke wan baala di meke fu yeepi i te i fuka.” Kristen suku yeepi a den mati fi en di e dini Yehofa. A sani ya yeepi en? A taki: „Den mati fu mi yeepi mi a omen sowtu fasi! Son wan fu den be e fika boomiki anga nyanyan sani di den bai a wenkii a mi doomofu. Dii leisi wan kulu sama kon yeepi mi anga den pikin, di u be mu foloisi. Wan sama yeepi mi suku wooko. Ala yuu den mati fu mi be e holibaka gi mi.”

Delphine di u be taki fi en na a bigin seefi be e fii enke neen wawan de. Te a be e sidon denki ala den sani di miti en, a be e taki: „Mi be e si fa taa sama e libi switi anga den famii anga den mati, ma mi be e fii enke a mi wawan de.” A tekisi di yeepi en a Psalm 68:6. Ape sikiifi taki: „Gadu e gi den sama di wawan de, wan osu fu tan.” A taki: „Mi sabi taki a tekisi ya á be e taki fu wan tuutuu osu. Ma ai soi taki Gadu e yeepi u fu fende wan peesi pe wi e de anga sama di lobi u. Den sama de lobi Yehofa tu. Ma mi be fusutan taki efu mi be wani toon bun mati anga den sama ya, mi be mu toon Yehofa mati fosi. A tekisi fu Psalm 37:4 yeepi mi. Ape sikiifi taki: ’Piisii pasa maiki fu Yehofa ede, da a o gi i san yu ati wani.’”

Delphine taki: „Mi si taki mi be mu meke moiti fu sabi Yehofa moo bun. Sama á de enke en. Mi sikiifi a pampila san mi sa du makandaa anga taa sama di e dini Yehofa, fu mi toon mati anga den. Mi be e meke moiti fu si den bun di taawan e du. Mi á be e poti pakisei a den fowtu fu den.”

Den sama di e dini Gadu a sondu sama. Den Yehofa Kotoigi seefi abi polobelema enke ala taa sama. Ma den sani di Beibel e leli den, e meke den yeepi taawan te den de a nowtu. A bun fu abi den sowtu mati ya. Ma Beibel poi yeepi u efu wi abi wan siki di dataa á poi deesi? A man yeepi u te wi e kusumi fu di wan sama fu u dede?