Aini den ten di pasa, sama fu ala sowtu nasi be e biibi den sani di sikiifi aini Beibel. Aini a ten ya, milyunmilyun sama e wooko anga den leli fu Beibel. Toku son sama e si den sani di sikiifi aini Beibel enke fositen toli di á poi yeepi sama aini a ten ya moo. Son sama e si den sani ya enke anainsitoli. Ma fa yu e si den sani di sikiifi aini Beibel? I si enke den sani ya a tuu?

Fa yu o sabi efi i sa biibi den sani di sikiifi aini Beibel? Meke u taki yu abi wan mati di gwenti taki a tuu. Yu á be o fitoow en noh? Eeye. A so a de anga a Beibel tu. Saide u sa biibi den sani di sikiifi aini Beibel? Wi o luku wantu toli di e soi saide u sa biibi den sani ya.

Den sama di sikiifi Beibel be e taki a tuu

Den sama di sikiifi Beibel be e taki a tuu ala yuu. Den be e sikiifi den fowtu di denseefi meke tu. Di a polofeiti Yona á be du san Yehofa taki wan leisi, a sikiifi fu a sani ya tu (Yona 1:1-3). Aini a lasiti pisi fu a buku di Yona sikiifi, a soi fa Gadu puu kaasi gi en. Ma a á sikiifi efu a kengi en manii baka di Gadu puu kaasi gi en, bika a á be wani poti pakisei neen seefi (Yona 4:1, 4, 10, 11). Den Beibel sikiifiman sikiifi finifini fu den fowtu di denseefi be meke. A sani ya e soi kiin taki den sani di den sikiifi a tuu.

Ai soi u fa u mu libi

Den sani di Beibel e leli u poi yeepi wi aini a ten ya? Eeye. Wan fu den sani di ai leli u, a fa u mu libi anga taawan. A sikiifi aini Beibel taki: „A den sani di i wani taawan du gi i, i mu du gi den tu” (Mateyesi 7:12). „Te wi e taki switi anga taawan, da den ati nai boon moo. Den ati e koo. Ma te wi e taki sani fu hati taawan, da den ati e moo boon” (Odo 15:1). Eeye, te anga a dei fu tide wi e fende wini te wi e wooko anga den sani di sikiifi aini Beibel.

 Den toli di sikiifi aini, be pasa tuu

A omen yali kaba koniman e ondoosuku luku efu den sama di kai aini Beibel, anga den peesi di kai aini be de tuu. Den e ondoosuku tu efu den toli di sikiifi aini be pasa tuu. Meke u luku wan fu den sani di den be ondoosuku. A sikiifi aini Beibel taki aini a ten fu Nehemiya, Tirus-sama (Fenisiyasama di be komoto a Tirus) di be e tan a Yelusalem be e ’tyai fisi anga omen taa sani kon a Yelusalem fu seli’.​—Nehemiya 13:16.

Buweisi de di e soi taki a sani di sikiifi aini Beibel ya be pasa tuu? Eeye. Ondoosukuman fende fositen sani fu Fenisiyasama aini Islayeli. A sani ya e soi taki den Fenisiyasama be e seli sani gi den Islayelisama tuu, leti enke fa a sikiifi aini Beibel. Boiti dati, den ondoosukuman fende fisi bon fu a Mindiikondee Se aini Yelusalem tu. Den ondoosukuman e biibi taki a sama di be e tan faawe be tyai den fisi ya go seli a Yelusalem. Baka di den fende den sani ya, wan koniman taki: „A sani di sikiifi a Neh[emiya] 13:16 taki Tirus-sama be go seli fisi aini Yelusalem, sa de so tuu.”

Den sani di Beibel taki e kai anga san koniman ondoosuku

Beibel a wan buku di e taki fu fositen toli. Ai soi u tu fa u mu dini Gadu. Ma toku den sani di a taki e kai anga san koniman ondoosuku. Meke u luku wan fu den sani ya.

Wan sani fu 3500 yali pasa, a be sikiifi aini Beibel taki a goontapu á fasi a „nawan sani” (Yopu 26:7). A omen anainsitoli sama be e gi fu a sani ya. Son sama be e taki a wataa tapu a goontapu de. Taawan be e taki a wan gaan koo e tyai a goontapu. Baka wan sani fu 1100 yali di a buku Yopu sikiifi, sama be e biibi ete taki a goontapu á poi de a wan leigi peesi, a musu de taki a wan sani tapu a de. Ma wan sani fu 300 yali pasa, aini a yali 1687, neen fosi Isaac Newton meke sama sabi san a kon fusutan baka di a ondoosuku fa a zwaartekracht e wooko. A yeepi sama fu fusutan taki na a kaakiti ya di sama á poi si anga ain, e holi a goontapu fu a daai lontu a tapu. A sani di a koniman ya ondoosuku e soi kiin taki a sani di Beibel be taki moo enke 3000 yali pasa, a wan tuu toli.