Fa sani o waka aini a ten di e kon?
Yu akisi iseefi kaba san o pasa aini a ten di e kon? Beibel e soi taki a omen gaan sani o pasa dyonson di o seke ala sama a goontapu.
Yesesi be taigi u fa wi o du sabi taki „a Kownukondee fu Gadu de koosube” (Lukasi 21:31). A be taki kondee be o feti anga kondee, gaan seke-doti be o de, angiiten, takuu siki di e kii omen sama anga omen taa sani ete. Na ala den sani ya wi e si e pasa nownow.—Lukasi 21:10-17.
Beibel e soi tu taki aini den „lasiti dei” di libisama be o tii goontapu, sama á be o tyai denseefi bun. I sa leisi a sani ya a 2 Timotiyesi 3:1-5. Te i luku fa sama e tyai denseefi aini a ten ya, iseefi e si kiin taki a san Beibel be taki a fesi e pasa nownow.
San a sani ya wani taki? A sani ya e soi taki a ten di Gadu Kownukondee o tyai wan gaan kengi kon na a goontapu koosube (Lukasi 21:36). Gadu paamisi aini Beibel taki a o du omen bun sani anga a goontapu. A o du bun gi den sama di e tan a goontapu tu. Meke u luku wantu sani di a o du.
A O POTI BUN TIIMAN
„Neen a gi en makiti fu tii. A fende gaandi anga wan kownukondee. Neen meke ala den sama fu den kondee anga den sama di e taki ala sowtu tongo mu dini en. A tiimakiti fi en o tan fu teego, noiti a o kon a wan kaba. Noiti a kownukondee fi en o booko tu.”—DANIYELI 7:14.
San a sani ya wani taki? Yu o piisii fu a libi te a tiimakiti fu Gadu di a sete, o tii a hii goontapu. Neen Manpikin na a Kownu fu a tiimakiti ya.
YU O GUSONTU
„Nawan sama di e tan ape o taki: ’Mi siki.’”—YESAYA 33:24.
San a sani ya wani taki? Noiti yu o siki. I ná o malengii. I ná o dede noiti.
SAMA O LIBI NA A WAN
„A o tyai wan kaba kon a feti na ala se fu goontapu.”—PSALM 46:9.
San a sani ya wani taki? Noiti moo wi o feele taki tu kondee o feti anga denseefi. Sama ná o pina moo fu di feti e feti aini den kondee.
A SOSO BUN SAMA O DE A GOONTAPU
„Den ogii sama ná o de moo . . . A den safu-ati sama o fende goontapu.”—PSALM 37:10, 11.
San a sani ya wani taki? A sani ya wani taki sama ná o de moo di e du ogii. A soso den sama di e aliki Gadu anga den hii ati o tan a goontapu.
A HII GOONTAPU O TOON WAN PALADEISI
„Den o meke osu da den o tan aini, den o paandi doloifigoon, da denseefi o nyan den sani di den paandi.”—YESAYA 65:21, 22.
San a sani ya wani taki? A hii goontapu o kon moin. Gadu o du san wi e begi en. A o meke sani waka enke fa a „wani a goontapu”.—Mateyesi 6:10.
