Fa den e kai Gadu nen? Gadu seefi taki: „Mi a Yehofa, a so den e kai mi” (Yesaya 42:8). A nen fu Gadu sikiifi wan sani fu 7000 leisi aini Beibel. Ma den sama di e puu Beibel poti aini taa tongo, puu a nen ya aini omen Beibel neen den poti „Masaa” a pe a nen ya be sikiifi. Gadu wani i toon en mati, neen meke ai gi i taanga-sikin fu „kai en nen”.​—Psalm 105:1.

Wantu fasi fa Beibel e kai Yehofa. Beibel e kai Yehofa „Gadu”, „a Moo Taanga Gadu”, „a Sama di meke u”, „u Dda”, „Masaa” anga „a Moo Gaan Gadu”. Te wi e leisi Beibel wi e si omen pisi di e soi fa sama be e kai Yehofa te den be e begi. Den be e kai en „Masaa” efuso wan fu den taa fasi di sikiifi a tapu ya. Ma den be e kai en neen nen tu, Yehofa.​—Daniyeli 9:4.

 Fa Gadu tan? Gadu a wan yeye, wi á poi si en (Yohanisi 4:24). Beibel taki „noiti wan sama si Gadu” (Yohanisi 1:18). Beibel e soi u fa Yehofa e fii. Den sani di wi e du sa meke a fii tyali. Ma te wi e du bun sani, da ai „piisii”.​—Odo 11:20; Psalm 78:40, 41.

Den manii fu Gadu. Gadu nai paati bee. A lobi sama fu ala sowtu nasi, lo, kondee, anga tongo (Toli 10:34, 35). Gadu „abi tyali-ati. A abi switifasi. En ati nai boon gaw. Ai du bun ala yuu. Ai du ala san a taki” (Ekisodesi 34:6, 7). Ma fo fu den manii fu Gadu moo pelensipali.

Kaakiti. Fu di Yehofa na a „Moo Taanga Gadu”, meke a abi a kaakiti fu du ala san a paamisi.​—Genesesi 17:1.

Koni. Beibel taki Gadu abi „ala koni”. Dati wani taki a koni moo ala sama.​—Romesama 16:27.

Ai du sani a wan letifasi. Ala yuu Gadu e du sani a wan „letifasi”. Noiti ai „du ogii”.​—Deitolonomi 32:4.

Lobi. Beibel taki „Gadu a lobi” (1 Yohanisi 4:8). Ná lobi namo Gadu lobi u, ma neen lobi bigin. Ai soi lobi aini ala san ai du. Den sani di ai du e tyai wini gi wi a omen fasi.

Gadu wani libisama toon en mati. Gadu a u Dda di e tan a hemel (Mateyesi 6:9). Efu u soi taki wi e biibi en, wi anga en sa toon mati (Psalm 25:14). Fu taki en kiin, Gadu e kai u fu go koosube neen. Beibel taki: „Fika ala den polobelema fi i gi en, bika ai booko en ede anga i.”​—1 Peitilisi 5:7; Yakowbesi 4:8.

Yesesi a ná Gadu. Yesesi abi wan hei posisi, bika neen wawan too Gadu seefi meke. Neen meke Beibel e kai en Gadu Manpikin (Yohanisi 1:14). Baka di Yehofa meke en fosi Manpikin Yesesi, neen a meke Yesesi wooko makandaa anga en enke „wan sama di koni fu du en wooko”, fu meke ala taa sama anga ala taa sani.​—Odo 8:30, 31; Kolosesama 1:15, 16.

 Noiti Yesesi taki en na Gadu. A peesi fu dati a taki: „[Gadu] sende mi fu taki gi en, neen sende mi kon” (Yohanisi 7:29). Di Yesesi be e taki anga wan fu den bakaman fi en, a kai Yehofa „mi Dda anga u Dda”, „mi Gadu anga u Gadu” (Yohanisi 20:17). Baka di Yesesi dede, Yehofa weki en baka fu a sa go tan a hemel. A gi Yesesi gaan makiti na a leti-ana fi En.​—Mateyesi 28:18; Toli 2:32, 33.

Yesesi Kelestesi sa yeepi i fu toon Gadu mati

Yesesi be kon a goontapu fu leli u sama neen Dda. Yehofa taki fu Yesesi taki: „Disi a mi Manpikin, mi lobi en. U mu aliki en” (Malikisi 9:7). Yesesi sabi Gadu bun moo ala taa sama. A taki: „Nawan sama sabi a Dda, boiti a Manpikin anga den sama di a Manpikin wani yeepi fu kon sabi a Dda.”​—Lukasi 10:22.

Yesesi e soi den manii fu Gadu bun moo ala taa sama. Yesesi abi denseefi manii fi en Dda, neen meke a be man taki: „A sama di si mi, si a Dda tu” (Yohanisi 14:9). Yesesi be e yeepi sama fu toon Gadu mati, bika a be e soi den manii fi en anga den sani di a be e du. A be taki: „A mi na a pasi, a tuu anga a libi. Sondee mi, nawan sama poi doo na a Dda” (Yohanisi 14:6). Boiti dati a taki: „Den sama di e dini a Dda tuutuu, o dini en anga a yeepi fu a santa yeye, anga a tuu. Bika a Dda e suku den sama di wani dini en na a fasi ya” (Yohanisi 4:23). A ná wan gaan sani noh? Yehofa e suku sama enke yu, di wani sabi en tuutuu.