‘A yu na a sama di e aliki begi. A yu ala sowtu sama o kon suku yeepi.’​—Psalm 65:2.

Son sama e begi fu di begi e meke den fii bun, ma a ná fu di den e biibi taki wan sama de di e aliki den. Ma begi a ná wan sani di u mu du namo fu di u wani fii bun. Beibel taki: ‘Yehofa * de koosube a den sama di e kai en. . . . Ai yee te den e kai en.’​—Psalm 145:18, 19.

Neen meke u sa biibi taki Yehofa e aliki den begi fu den sama di e dini en. A paamisi u taki: ‘U mu kai mi. U mu kon a mi. U mu begi mi, da mi o aliki u.’​—Yelemiya 29:12.

‘Begi naamo.’​—Romesama 12:12.

Beibel e gi wi a taanga-sikin fu ‘begi ala yuu’. A sani ya e soi taki Yehofa Gadu wani u begi en.​—Mateyesi 26:41; Efeisesama 6:18.

Saide Gadu wani u begi en? Dda anga mma e piisii te den pikin e akisi den fu yeepi den a sani. Son leisi wan dda sabi kaba san en pikin abi fanowdu, tokuso ai fii bun te a pikin seefi akisi en, bika a sani ya e soi taki a pikin lobi en, ai fitoow en. A letiso a de anga Yehofa Gadu tu. Te wi e begi en, wi e soi taki wi e fitoow en. Wi e soi tu taki u wani de mati anga en.​—Odo 15:8; Yakowbesi 4:8.

‘Fika ala den polobelema fi i gi en, bika ai booko en ede anga i.’​—1 Peitilisi 5:7.

Gadu wani u begi en bika a lobi u, ai booko en ede anga u. A sabi ala den polobelema anga booko-ede di wi abi. A wani yeepi u tu.

Kownu David begi Yehofa en hii libi langa. A be e taigi Yehofa san a be e denki anga fa a be e fii (Psalm 23:1-6). Fa Gadu be e si David? A be lobi David. A be e aliki den begi fi en tu (Toli fu den apostel 13:22). Gadu lobi mi anga i tu, neen meke ai aliki te wi e begi en.

A wan fu den sama di sikiifi a Beibel buku Psalm be taki a sani ya. A man ya be e biibi taki Gadu e aliki den begi fi en. A sani ya be e meke a kon moo koosube a Gadu. A gi en kaakiti tu fu pasa den tesi di be e miti en.​​—Psalm 116:1-9.

Efu wi e biibi taki Gadu e aliki den begi fu u, wi o go e begi en ala yuu. Luku a toli fu Pedro di e tan a Sipaniyookondee. Di wan fu den boi fi en be abi 19 yali, wagi naki en kii. A sani ya be ibi gi Pedro, neen meke a begi Gadu neen a taigi en ala san de neen ati. San pasa di Pedro begi naamo? A taki: ‘Yehofa aliki den begi fu mi, neen a meke taa Kelesten gi mi anga mi uman taanga-sikin.

A tuu taki a boi fu den á kon a libi baka, ma toku begi yeepi a osufamii ya a omen fasi. María Carmen, a uman fu Pedro taki: ‘Begi yeepi mi fu pasa a taanga ten ya. Mi sabi taki Yehofa Gadu be e fusutan fa mi e fii, bika te mi be begi en mi be e fii moo bun.’

Den sani di sikiifi aini Beibel anga den sani di taa sama taki e soi kiin taki Gadu e aliki te wi e begi. Ma a ná ala begi Gadu e piki. Saide Gadu nai piki son begi?