‘Te wi e begi wi á mu e taki aseefi sani naamo.’​—Mateyesi 6:7.

Yehofa á wani wi e taki aseefi sani ala leisi te wi e begi en. A á wani wi e leisi den begi fu wi a wan pampila tu. A wani u taigi en san de a wi ati. Pakisei fa i be o fii efi i be abi wan mati, ma ala yuu te yu anga en e taki a denseefi toli ai gi i. Yu á be o fuka noh? Wan tuutuu mati e taigi i fa ai fii anga fa ai denki. Te wi e taki san de wi ati te wi e begi, da wi e soi Gadu taki wi e si en enke u mati.

‘Te wi e begi, a nai aliki u, bika wi e begi anga takuu pakisei.’​—Yakowbesi 4:3.

Efu wi e begi Gadu fu yeepi wi anga wan sani di u sabi taki a á lobi, da a ná o piki a begi de. Meke u taki wan sama e go bai wan lowte neen a begi Gadu fu yeepi en fu a wini, i si enke Gadu be o aliki a begi de? Nono, bika Gadu taki wi á mu abi takuudu. A bali u taki wi á mu e biibi sani enke koloku tu (Yesaya 65:11; Lukasi 12:15). Efu u wani Gadu piki den begi fu u, da u mu akisi en sani di e kai anga den sani di ai leli wi aini Beibel.

 ‘Gadu e buuse den begi fu den sama di á wani du san a weiti fi en e taki.’​—Odo 28:9.

Aini Beibel ten, Gadu á be e aliki den begi fu den sama di be e taangayesi en (Yesaya 1:15, 16). Gadu á kengi (Maleyaki 3:6). Neen meke efu u wani a aliki den begi fu u, u mu meke moiti fu du sani enke fa a taki. Kande fosi i be e du sani di Gadu á lobi. A sani ya wani taki a ná o aliki den begi fi i noiti? Nono. Efu u soi taki ai hati u taki u be e du sani di Gadu á lobi, neen u meke moiti kengi, Gadu o gi u paadon.​—Toli fu den apostel 3:19.