María, Raúl, Arne, anga omen taa sama e si begi enke wan kado. Den e fii taki te den e begi, den sa gi Gadu daa, den sa taigi en fa den e fii, den sa akisi en fu yeepi den tu. Ala den sama ya e biibi a sani di Beibel e taki fu begi. Ai taki: ‘U sabi taki winsi san wi e akisi en, a o aliki u, solanga ai kai anga san a wani.’​—1 Yohanisi 5:14.

Ma a omen sama nai biibi den sani di Beibel e taki fu begi. Steve a be wan fu den sama ya. A taki: ‘Di mi be abi 17 yali, dii mati fu mi dede. Wan fu den naki anga wagi. Den taa tu dede a wataa.’ San Steve du? A taki: ‘Mi begi Gadu fu a taigi mi saide den sani ya pasa, ma a á piki mi. Neen meke mi denki a miseefi taki: “Da fu saide mi e begi seefi?”’  Te sama e fii enke Gadu nai piki den begi fu den, da a sani ya e meke den si enke a fu soso den e begi.

Ma taa sani de ete di e meke son sama e si enke u ná abi fu begi Gadu. Son sama e taki Gadu sabi ala sani, a sabi san mi abi fanowdu. Da saide mi mu taigi en wan sani di a sabi kaba?

Taawan e si enke Gadu ná o aliki te den e begi, fu di den be du wan ogii. Jenny taki: ‘Mi e fii enke mi á bun seefiseefi. A omen sani mi du di e hati mi, neen meke mi e si enke mi á bun fu taki anga Gadu.’

Fa iseefi e denki? Efi yu e fii enke den sama di u kai a tapu ya, da ná booko yu ede, bika Beibel poi piki ala den akisi fi i. * I sa fende piki fu akisi enke:

• Gadu e aliki u te wi e begi?

• Saide a nai piki son begi?

• Fa i mu begi efi i wani Gadu aliki i?

• Sowtu wini yu o fende te yu e begi?