Saide sama e buuse taawan?
Saide sama e buuse taawan na ala se fu goontapu? Fu man piki a akisi ya, u mu fusutan fosi san a sani ya wani taki, fa ai bigin, anga fa ai paati.
On ten i sa taki wan sama e buuse wan taawan?
Te wan sama e buuse wan taawan, a wan sowtu takuu atiboon ai kweki gi en. A sowtu atiboon ya sa meke a du ogii anga a sama.
SAIDE WAN SAMA E BIGIN BUUSE WAN TAAWAN?
A omen sani sa meke wan sama bigin buuse taawan. Gaanse leisi wan sama e buuse wan taawan fu di a á lobi a kulu sama de. Kande a sama di e buuse a taawan e fii taki a kulu sama di ai buuse abi takuu manii. Kande ai si enke ala den sama de na a wan. Son leisi ai si a kulu sama de lagi moo en, enke sama di taawan mu feele, efuso sama di e du ogii na ala pe den e go. Son leisi a wan sani wan sama fu wan nasi e du anga en, da ai daai buuse ala den sama fu a nasi de.
FA A SANI YA E PAATI?
Son sama e buuse wan sama sondee fi en anga en miti wan dei. Fa a sani ya e pasa? Efu den famii efuso mati fu wan sama e buuse wan sama, enseefi sa bigin buuse a sama sondee fu a sabi en. Neen meke te fi i denki wan hii kulu sama e bigin buuse wan taa kulu sama di den á sabi seefi.
Te i luku fa a sani ya e paati, da wi e fusutan moo bun saide sama e buuse taawan na ala se fu goontapu. Ma wan taa sani de ete di e meke sama buuse taawan. Wi o luku aini Beibel fa a du kon taki sama e buuse taawan.
BEIBEL E TAIGI U PE BUUSE BIGIN
A NÁ LIBISAMA BUUSE BIGIN. A sani ya bigin di wan engel di be de a hemel sitee anga Gadu. Nownow sama sabi a engel ya enke Saatan Didibii. ‘Fanafu a bigin neen Didibii e kii sama.’ Neen na ‘a dda fu lei’, neen meke te enke a dei fu tide ai paati lei di e meke sama buuse taawan (Yohanisi 8:44; 1 Yohanisi 3:11, 12). Beibel taki Didibii saka kon a goontapu anga gaan atiboon, neen meke ai du ogii anga sama.—Yopu 2:7; Openbaring 12:9, 12, 17.
FU DI LIBISAMA ABI SONDU MEKE MAKILIKI DEN SA BIGIN BUUSE TAAWAN. A fosi man, Adan waka a Saatan baka, neen meke tide na a dei ala sama abi sondu (Romesama 5:12). Kain, a fosi manpikin fu Adan be buuse en baala Abel te neen a kii en (1 Yohanisi 3:12). Sama de ete di lobi taawan. Ma gaanse sama aini a ten ya e denki denseefi namo, den e dyalusu anga taawan, den e fii denseefi tu. Te wan sama abi den manii ya, a makiliki a sa bigin buuse taawan.—2 Timotiyesi 3:1-5.
DEN SAMA DI Á KABA LOBI SAMA DI E DU SANI TAA FASI ENKE DEN, E MOO BUUSE TAAWAN. Na ala pe i daai aini a goontapu yu e si fa sama e libi ogii anga taawan. Gaanse sama e si den sani ya enke wan kowownu sani. Beibel taki ‘a hii goontapu de aini a makiti fu Saatan Didibii’, neen meke sama lai di e buuse taawan.—1 Yohanisi 5:19.
Beibel nai taigi u namo pe a takuu manii ya bigin, ma ai soi u tu san u mu du efu wi á wani abi a manii ya.
