Kande a sani ya á miti i noiti, toku i musu si kaba fa sama e libi ogii anga taawan fu di den e buuse den. Na ala dei wi e yee a nyunsu fa sama fu a wan nasi e du ogii anga sama fu taa nasi. Wi e yee fa sama e du ogii anga man di e libi anga man, uman di e libi anga uman, efuso taakondee sama. A sani ya meke lanti poti weiti aini omen kondee fu sitaafu den sama di e du den sowtu ogii ya.

Gaanse leisi, te sama e libi ogii anga wan sama, da a sama de seefi e daai libi ogii anga taawan. Neen meke solanga sama de a goontapu di e buuse taawan, a sani ya o moo ogii dei fu dei.

Kande sama e paati bee anga i fu di yu anga den a ná fu aseefi nasi. Kande den e soso i, efuso kosi i. Ma te sama e buuse taawan den e du moo gaan ogii anga den. Son leisi den e boto den fon, efuso poli den sani fu den. Den e suwa anga den sama ya efuso kii den. Son leisi den e suku fu kii ala den sama fu wan nasi efuso lo di den e buuse.

Aini A Wakititolen ya, wi o luku san o yeepi u fu wi á buuse taawan moo. A o piki den akisi di de a ondoo ya tu:

• Saide sama e buuse taawan?

• San u mu du fu wi á buuse taawan?

• Wan ten o kon pe sama ná o buuse taawan moo?