NÁ BUUSE TAAWAN MOO
3 | Yu á mu e buuse taawan aini yu ati
Beibel e taki:
‘U mu kengi a fasi fa wi e denki, da u libi seefi o kengi. Da wi o sabi san na a pasi fu Gadu di bun, di e meke a piisii, di ná abi nawan fowtu.’—ROMESAMA 12:2.
San a tekisi ya e leli u:
Den sani di wi e pakisei aini wi ati, pelensipali gi Gadu (Yelemiya 17:10). Wi á mu e du, efuso taki sani di e soi taki wi e buuse taawan. Ma dati wawan á sai. A den sani di de aini wan sama ati e meke a bigin buuse taawan. Neen meke efu wi á wani buuse taawan moo, u mu kengi a fasi fa wi e denki fu den.
Fa i sa wooko anga a sani di a tekisi ya taki:
A bun fu ondoosuku luku fa yu e si sama di komoto a wan taa kondee efuso sama fu wan taa nasi. I sa akisi iseefi taki: ‘Fa mi e si den sama ya? Mi sabi den tuutuu? Efuso a fu di den a fu wan taa nasi meke mi e si den wan fasi?’ Luku bun anga san yu e luku efuso leisi. Efi i gwenti luku felon efuso leisi sani di e soi fa sama e buuse taawan, a o moo taanga gi i fu puu a fii ya aini yu ati.
A Wowtu fu Gadu sa yeepi u fu u nai buuse taawan moo
U nai si useefi enke fa taawan e si u, neen meke a á makiliki ala yuu fu sabi efu wi e denki bun fu wan toli. Ma a Wowtu fu Gadu sa ‘tyai kon a kiin gi u san de aini wi ati tuutuu’ (Hebrewsama 4:12). Meke moiti fu e sutudeli Beibel ala yuu, da i luku efu den sani di yu e leli e kai anga a fasi fa yu e denki. A Wowtu fu Gadu sa yeepi u fu u nai buuse taawan moo, winsi a sani ya á makiliki.—2 Korentesama 10:4, 5.
