Yehofa Gadu e taigi u taki u sa taki anga en fu iniiwan booko-ede di wi abi (Psalm 55:22). Winsi a polobelema bigi efuso a nyoni, u sa begi Gadu fi en. Solanga wan sani pelensipali gi u, a pelensipali gi Yehofa tu, bika a lobi u. Begi a wan pelensipali sani di u mu du, bika ai yeepi u fu fii moo bun.​—Filipisama 4:6, 7.

Te wi abi kusumi siki, anga taa siki di e meke we booko wi ede naamo, da son yuu we fii enke aw wawan de, bika a ná ala yuu taa sama e fusutan fa we fii (Odo 14:10). Ma te we taigi Gadu fa we fii, da ala yuu ai aliki wi anga pasensi. Ai fusutan fa we fii tu. Yehofa e si u, a sabi sowtu booko-ede wi abi. Neen meke a wani u taigi en ala den sani di e gi u booko-ede.​—2 Koloniki 6:29, 30.

Te we begi Yehofa, da a sani de e meke u fii taki ai booko en ede anga u. We fii enke a psalm sikiifiman di be taki: ‘Ye si fa mi e tyotyo. I sabi sai miti mi’ (Psalm 31:7). Te u sabi taki Yehofa e si sai miti u, a sani de sa yeepi u te a libi e taanga gi u. Ma a ná si namo Gadu e si den polobelema fu u. Yehofa e fusutan u moo iniiwan taa sama. Ai yeepi u fu fende taanga-sikin aini Beibel tu.