Den sama di taki den sani ya, a sama di abi kusumi siki. I fii so wan leisi kaba? Yu abi wan mati di abi kusumi siki?

A nai wawan a sani ya e miti. A omen sama aini a ten ya abi kusumi siki. Son yuu a den famii fu den efuso den mati fu den abi a siki ya.

A omen sani e pasa aini a ten ya di e meke a libi ‘taanga’ gi u. Den sani ya e meke we kusumi (2 Timoteyesi 3:1). Di den ondoosuku a toli ya a hii goontapu (WHO), den kon si taki tei teli aitin sama, da wan fu den abi wan sowtu kusumi siki. Aini a yali 2020 di a COVID-19 siki paati a hii goontapu, moo sama be kon abi kusumi siki.

A bun fu sabi omen sama abi a siki ya, ma dati a ná a moo pelensipali sani. A moo pelensipali sani a fu sabi fa yu anga yu osufamii sa libi anga a siki ya.

Te wan sama nai kusumi ai fii bun. Winsi wan sani e gi en booko-ede, toku ai piisii. A nai sidon pakisei a sani de naamo. Ai man du sani di a lobi tu.

• A NÁ swaki a sama swaki meke ai kusumi pasa peesi.

• A SIKI A SAMA SIKI, neen meke ai booko en ede naamo anga sani. Sowan sama nai poi denki kiin ala yuu. Son yuu ai tyali, son yuu en ati e boon wanboowanboo.

• Son yuu ai taanga gi den sama ya fu abi mati. Ai taanga gi den tu fu du den sani di den mu du ala dei.

• Na ala sowtu sama abi den sowtu siki ya. Yonkuu sama, gaansama, ala sowtu nasi. Sikoo sama, anga sama di á go a sikoo. Gudu sama, anga pootiman e abi a siki ya tu.

Kande wan sama e du son sani di aa be gwenti du. Kande ai siibi hii dei, efuso kande a nai poi siibi a neti. Kande ai nyan ipi moo enke san a be gwenti efuso kande a nai wani nyan. A kan tu taki ai booko en ede anga ala sowtu sani, efuso ai kusumi ala yuu. Te den sani ya e pasa anga wan sama, da a bun fu a go suku yeepi a dataa.

Yesesi Kelestesi a moo koniman di libi a goontapu be taki: ‘Gusontu sama naabi dataa fanowdu, a siki sama abi dataa fanowdu’ (Mateyesi 9:12). Te wan sama di abi kusumi siki go a dataa, den sa gi en deesi di o meke a fii moo bun. A siki naw fooseli en so moo. Efu den sani di u kai a tapu ya e miti wan sama wan pisiten kaba efuso ai kon moo ogii, da aa mu daaidaai fu go suku yeepi a dataa. a

Beibel a ná wan dataabuku, ma toku den sani di sikiifi aini sa yeepi u te wi abi kusumi siki. Neen meke u wani gii taanga-sikin fu leisi den sani di sikiifi aini A Wakititolen ya di e soi fa Beibel sa yeepi u te wi abi a siki ya.