Beibel a ná wan dataabuku. Ma son sani di sikiifi aini sa yeepi i te yu abi kusumi siki. Meke u luku wantu tekisi di sa yeepi i.

‘Gusontu sama naabi dataa fanowdu, a siki sama abi dataa fanowdu.’​—MATEYESI 9:12.

Beibel e soi taki son yuu a bun fu go a dataa. Son sama di abi kusumi siki fende wini di den kon sabi moo fu a siki fu den. Son wan fu den go a dataa go suku yeepi. Den fende wini di den du a sani de.

‘A bun fu du sani fu losi a sikin.’​—1 TIMOTIYESI 4:8.

Te ye du sani fu losi a sikin, a sani de e yeepi te yu abi booko-ede. A sani ya wani taki i mu abi wan dei anga wan yuu di ye du sani fu losi a sikin. I mu e nyan sani di gusontu, i mu e siibi bun tu.

‘Wan ati di e piisii a wan bun deesi, ma wan sama di e fii booko-saka nai abi kaakiti.’​—ODO 17:22.

Te ye leisi Beibeltekisi di e gii taanga-sikin, da a sani de sa yeepi i fu piisii. I mu e poti pakisei a den bun sani fu a libi. I mu e biibi tu taki sani o go bun aini a ten di e kon. Den sani ya o yeepi i fu holidoo te ye kusumi.

 ‘Wan sama di abi sakafasi koni.’​—ODO 11:2.

Kande yo si taki ya poi du ala sai wani du. Efii si so, i mu akisi sama fu yeepi i. Kande wan famii fii efuso wan bun mati fii wani yeepi i, ma kande den á sabi fa den mu yeepi i. Taigi den fa den sa yeepi i, ma ya mu akisi den fu yeepi yu anga sani di á de fanowdu.

‘Mia be e kaba fii bun, neen meke mi go a dataa. A dataa taigi mi sowtu siki mi abi. A sani ya yeepi mi fu sabi san be e du mi. Mi meke dataa soi mi tu san mi mu du fu fii moo bun.’​—Nicole, a abi wan sowtu kusumi siki (bipolaire stoornis) di e meke ai fii wan hii taa fasi wanboowanboo. Ai meke a du sani buuyabuuya.

‘Mi kon si taki te mi e leisi Beibel ala dei anga mi uman, a sani de e yeepi mi fu bigin a dei bun. Ai yeepi mi fu pakisei sani di e gi mi taanga-sikin.’​—Peter, a abi wan siki di e meke ai kusumi ala yuu.

‘Sen be e kisi mi fu taki anga taawan fu a siki fu mi. Ma wan bun mati fu mi be e aliki mi anga pasensi te mi be e taigi en fa mi e fii anga sai du mi. A yeepi mi fu fii moo bun. Mi nai fii enke a mi wawan e feti anga a siki ya.’​—Ji-yoo. A abi wan siki di e meke a nai wani nyan.

‘Beibel yeepi mi fu fusutan taki mia poi du ala sani. A yeepi mi fu si taki mia mu e wooko tumisi, mi mu e teke boo tu. Den sani ya yeepi mi fu holidoo anga a siki ya.’​—Timothy. A abi wan siki di e meke ai du sani pasa peesi (obsessief-compulsieve stoornis).