Kande we fii enke wa poi yeepi wan mati fu u di abi kusumi siki. Ma te ye soi en taki ye booko yu ede anga en, a wan fasi fai sa yeepi en.

‘I mu gaw fu yee.’​—YAKOWBESI 1:19.

Wan fu den moo bun fasi fai sa yeepi wan mati fii, a te ye aliki en te ai taki. I naabi fu piki ala yuu te a taki wan sani. Meke a si taki ye aliki en. A mu man fii tu taki ye booko yu ede anga en. Meke moiti fu fusutan fa ai fii, ya mu kuutu en. Holi a pakisei taki son yuu aw taki sani di o hati yu, ma bakaten kande aw hati en fu di a taki sondee fu denki.​—Yopu 6:2, 3.

‘Taki a wan fasi di e toosutu taawan.’​—1 TESALONIKASAMA 5:14.

Kande ye si taki i mati e buuya gawgaw. Kande ai fii enke aa bun. Ma te ye soi en taki i lobi en, a sani ya o gi en taanga-sikin. Winsi ya sabi sai mu taki, efuso sai mu du, efii soi en taki ye booko yu ede anga en, a sani ya o yeepi en fu fii moo bun.

‘Wan tuutuu mati o lobi yu ala yuu.’​—Odo 17:17.

Akisi i mati efu a wani i yeepi en anga son sani. Ya mu e si enke i sabi san a abi fanowdu. A moo bun fu akisi en fai sa yeepi en. Efu aa poi taigi i san a abi fanowdu, da akisi en efi yu anga en sa du wan sani makandaa. Kande u sa go koi. I sa akisi en efu a wani i tyai en go  bai sani. I sa yeepi en kiin osu efuso wan taa sani.​—Galasiyasama 6:2.

‘I mu abi pasensi.’​—1 TESALONIKASAMA 5:14.

A ná ala yuu i mati o wani taki fa ai fii. Taigi i mati taki te a fii fu taki, yo piisii fu aliki en. A siki o meke i mati taki efuso du sani di o hati i son leisi. Kande aw kengi pakisei wanboowanboo. Son yuu en ati o boon wanboowanboo tu. Neen meke i mu abi pasensi anga en. Tan soi en taki i lobi en te ye suku fu yeepi en.​—Odo 18:24.

‘Mi e aliki anga pasensi te mi mati wani taki fa ai fii. Winsi mia poi puu a siki ya gi en, toku mi e meke moiti fu aliki en. Son yuu a wan sama a abi fanowdu fu aliki en, da ai fii bun baka.’​—Farrah. a A abi wan mati di abi wan siki di e meke a feele. Ai kusumi ala yuu, a nai fii fu nyan.

‘Wan fu den mati fu mi abi bun manii, a nai kuutu mi. A kai mi go nyan wan sani neen osu. Di mi go neen osu, den manii fi en be meke mia be e feele fu taigi en fa mi e fii. Di mi taigi en fa mi e fii, mi be e fii moo bun.​—Ha-eun. A abi wan siki di e meke ai kusumi ala yuu.

‘Te wan sama abi den siki ya, a de taanga fanowdu fu abi pasensi. Te mi uman e du sani di e meke mi ati boon, da mi e holi a pakisei taki na a siki e meke ai du den sani ya. A sani ya e yeepi mi fu mi ati á boon neen. A sani de e yeepi mi fu libi switi anga en tu.’​—Jacob. En uman abi wan siki di e meke ai kusumi ala yuu.

‘A omen fasi mi uman e yeepi mi. Son yuu mi e buuya te, da mi nai wani du nawan sani. Te mi e fii so, da mi uman nai poi du den sani di a be wani du tu. Ai fika den sani fi en, da ai yeepi mi anga san mi abi fanowdu. Neen meke mi nai pee anga en, mi lobi en tuutuu.’​—Enrico. A abi wan siki di e meke ai feele wanboowanboo.