Beibel e soi u faw mu du sani
Wa poi taki na ala yuu sani o waka bun te we du sani enke faw fii efuso enke fa taawan wani. Beibel e soi u saide u taki so, ma ai taigi u moo sani tu. Beibel e soi u san bun anga san á bun. Den sani di ai leli u e yeepi u fu piisii.
WI ABI DEN LELI FU GADU FANOWDU
Beibel e soi u taki libisama abi Yehofa a fanowdu. Ai soi u tu taki u wawan á man du ala sani (Yelemiya 10:23). Neen meke a giw leli aini Beibel di e soi u faw mu du sani. Yehofa lobi libisama. Aa wani u du sani di o hati u efuso di o meke a libi moo taanga giw (Deitolonomi 5:29; 1 Yohanisi 4:8). Boiti dati, neen na a Sama di meke u. A koni. Neen meke a poi taigi u sani di o tyai wini giw (Psalm 100:3; 104:24). Ma Gadu nai dwengi sama fu libi enke fa a wani.
Yehofa be gi a fosi man anga uman, Adan anga Efa ala san den be abi fanowdu fu piisii tuutuu fu a libi (Genesesi 1:28, 29; 2:8, 15). A be taigi den wantu sani di den á be mu du tu. Aa be dwengi den fu du sani enke fa a taigi den, ma a be fika den fu denseefi luku san den o du (Genesesi 2:9, 16, 17). A tyali taki Adan anga Efa ná aliki Yehofa. Den du sani enke fa denseefi wani (Genesesi 3:6). Fa sani waka gi den? Te sama e du sani enke fa den wani, a sani ya e meke den piisii tuutuu? Nono. Beibel e soi u taki te sama nai wooko anga den leli fu Gadu sani nai waka bun gi den.—Peleikiman 8:9.
Beibel e yeepi u fu du sani anga koni. Winsi pe we tan, toku u sa wooko anga den leli fu Beibel. (2 Timotiyesi 3:16, 17; luku a faki di den e kai ‘ Wan buku gi ala sama’.) Luku fa Beibel du a sani ya.
Luku saide den e kai Beibel ‘a Wowtu fu Gadu’.—1 Tesalonikasama 2:13. Luku a felon a jw.org di den e kai Sama sikiifi a Beibel?
BEIBEL E SOI U SAN GADU WANI U DU
Beibel e soi u fa Yehofa anga libisama de. Den sani di sikiifi aini Beibel e yeepi u fu sabi san Gadu e si fu bun sani anga sani di á bun. Ai yeepi u fu sabi saw tyai wini giw anga san sa meke ogii miti u (Psalm 19:7, 11). A soso tuu sani we leli aini Beibel. U sa wooko anga den sani ya ala dei.
Luku san Odo 13:20 taki: ‘A sama di e waka anga koniman o koni, ma sani naw go bun anga a sama di e waka anga donman.’ Leti enke fa sama be e wooko anga a tekisi ya aini a ten di pasa, a so u sa wooko anga en aini a ten ya tu. Beibel abi tyaipi leli di u sa wooko anga den.—Luku a faki di den e kai ‘ U sa wooko anga den leli fu Beibel ete’.
Ma kande ye akisi iseefi taki: ‘Den sani di sikiifi aini Beibel poi yeepi mi tuutuu?’ Aini a taa artikel wo luku wantu toli di pasa tuutuu.
a Yehofa na a nen fu Gadu.—Psalm 83:18.
