Den leli fu Beibel poi yeepi i
A omen miliyun sama Beibel yeepi. Meke u luku fo sani di e soi taki u sa wooko anga den sani di Beibel e taki.
1. Toowlibi
A omen sowtu sani sama e denki fu a toowlibi. Den e denki taa fasi tu fu san sa yeepi wan sama fu den toowlibi waka bun.
BEIBEL TAKI: ‘Meke ibii man lobi en uman enke fa a lobi enseefi. A uman mu lesipeki en man anga en hii ati.’—Efeisesama 5:33.
SAN A TEKISI WANI TAKI: A Yehofa seefi sete a toowlibi. A sabi san sa meke wan toowlibi waka bun (Malikisi 10:6-9). Te toowpaa e booko den ede anga a taawan moo denseefi, a sani ya o meke den tu man piisii. Wan man di lobi en uman e solugu en. Ai libi bun anga en tu. Boiti dati, wan uman di lobi en man e holibaka gi en. Ai taki anga en a wan lesipeki fasi tu.
DEN LELI FU BEIBEL POI YEEPI I: Quang anga Thi a wan toowpaa di e tan a Vietnam. Den be e si enke noiti den be sa piisii aini a toowlibi fu den. Quang á be abi switifasi. A taki: ‘Mia be e booko mi ede anga fa Thi be e fii. Neen meke mi be e du sani di be e hati en.’ Thi be wani booko a toow. A taki: ‘Mia be e fitoow mi man moo. Mia be e lesipeki en moo tu.’
Bakaten Quang anga Thi wooko anga den sani di Beibel e taki fu a toowlibi. Den si fa den mu wooko anga a tekisi fu Efeisesama 5:33 aini a toowlibi fu den. Quang taki: ‘A tekisi ya yeepi mi fu si saide a de fanowdu fu soi switifasi. A yeepi mi tu fu soi Thi taki mi lobi en. Di mi du den sani ya, a be kon moo lobi mi. A be e moo lesipeki mi tu.’ Thi taki: ‘Mi be e wooko anga den sani di sikiifi a Efeisesama 5:33. Mi be e moo soi lesipeki gi mi man tu. A sani ya meke mi be e fii taki a lobi mi, ai booko en ede anga mi. U be e moo libi bun anga useefi.’
Efii wani sabi moo sani fu a toowlibi, i sa luku a Bakaatongo Ontwaakt! Nr. 2 2018 a jw.org di den e kai ‘Tips voor een gelukkig gezin’.
2. Fa fu libi anga taawan
A omen sama nai libi bun anga taawan. Son yuu na a fasi fa den kiya, a kondee di den komoto, a fasi fa den de, a keliki di den de, efuso fu di den e libi wan homo libi meke den e du ogii anga den.
BEIBEL TAKI: ‘Gi ala sowtu sama gaandi.’—1 Peitilisi 2:17.
SAN A TEKISI WANI TAKI: Beibel nai leli u taki u mu buuse sama fu taa nasi efuso taa kondee. A nai leli u taki u mu buuse sama di e libi wan homo libi tu. Ma ai leli u taki u mu lesipeki ala sama, winsi fa den kiya efuso sowtu kondee den komoto (Toli fu den Apostel 10:34). Winsi u nai holibaka gi son sani di sama e biibi efuso a fasi fa den e du sani, toku u sa lesipeki den.—Mateyesi 7:12.
DEN LELI FU BEIBEL POI YEEPI I: Daniel be leli taki a mu si den sama fu Asiya enke sama di wani kon du ogii aini en kondee. Neen meke a be bigin buuse den sama ya. Son yuu a be e taki sani fu hati den a peesi pe tyaipi sama be de. Daniel taki: ‘Mi be e fii taki mi e yeepi a kondee fu mi. Mia be e si enke den sani di mi be e du fowtu.’
Bakaten Daniel kon sabi san Beibel e taki. A taki: ‘Mi be abi fu kengi a fasi fa mi be e denki. Mi be mu si sama enke fa Gadu e si den. Winsi faw kiya efuso pe u komoto, toku ala u na aseefi.’ Daniel e taki now fa ai fii te a miti sama. A taki: ‘Mi nai booko mi ede moo fu sabi sowtu kondee den komoto. Mi lobi ala sama nownow, a omen mati mi abi ná ala se fu goontapu.’
Efii wani sabi moo sani fu a toli ya, i sa luku a Bakaatongo Ontwaakt! Nr. 3 2020 di den e kai ‘Vooroordelen: Hoe kom je ervan af’?
3. Moni
A omen sama e wani kon gudu, bika den e si enke a sani ya o meke den piisii tuutuu. Den e si enke te den kon gudu da sani o waka bun gi den aini a ten di e kon.
BEIBEL TAKI: ‘Koni e yeepi sama leti enke fa moni e yeepi sama. Ma te wan sama sabi sani, neen a koni tu, a o fende wini, bika koni o meke a tan a libi.’—Peleikiman 7:12.
SAN A TEKISI WANI TAKI: Wi abi moni fanowdu, ma moni á poi meke wan sama piisii tuutuu (Odo 18:11; 23:4, 5). Efu wan sama wani piisii tuutuu aini a ten di e kon, da a mu e wooko anga a koni fu Gadu di de aini Beibel.—1 Timotiyesi 6:17-19.
DEN LELI FU BEIBEL POI YEEPI I: Cardo a wan man fu Indonesia. A man ya be wani kon gudu. A taki: ‘Mi be abi ala sani di gaanse sama e suku. Mi be sa go a pe mi wani. Mi be abi omen diidii sani. Mi be abi omen wagi anga osu tu.’ Ma aa langa fosi a lasi ala sani. A taki: ‘Wan sama koli mi. A gwe anga ala a moni fu mi di mi wooko taanga fi en. A omen yali mi wooko taanga fu di mi be wani kon gudu. Ma mi lasi ala sani, mi be e fii enke mia bun.’
Cardo bigin wooko anga den sani di Beibel e taki fu moni. Aa be e feti fu kon gudu moo. Aa be e libi bigi moo tu. A taki: ‘Nownow mi e fii taki mi gudu tuutuu, bika mi anga Gadu a mati. Neti mi e siibi te a sai mi. Mi e piisii tuutuu.’
Efii wani sabi moo sani fu san Beibel e taki fu moni, i sa luku a Bakaatongo artikel a jw.org di den e kai ‘Kunnen opleiding en geld een beter leven garanderen’? aini A Wakititolen Nr. 3 2021.
4. Seks
A omen sowtu sani sama e denki te abi fu du anga seks.
BEIBEL TAKI: ‘Bika a disi a san Gadu wani: U mu santa, wa mu libi wan hululibi. Ala u mu sabi fa u mu basi u sikin fu u sa santa, da wi o meke Gadu piisii. Wi á mu meke den sekisi fii fu u basi wi enke fa ai basi den sama fu a goontapu di á sabi Gadu.’—1 Tesalonikasama 4:3-5.
SAN A TEKISI WANI TAKI: Beibel e soi u kiin fa Gadu wani u du sani te den seks fii fu u weki. A wowtu ‘hululibi’ abi fu du anga wan sama di e waka gi en toowpaa, sama di e seli den sikin, sama di e siibi anga denseefi sondee fu den toow, man di e siibi anga taa manengee, anga umansama di e siibi anga umansama (1 Korentesama 6:9, 10). Seks a wan kado di Yehofa gi sama di toow.—Odo 5:18, 19.
DEN LELI FU BEIBEL POI YEEPI I: Wan uman fu Australiya den e kai Kylie taki: ‘Di mia be toow, mi be e si enke di mi be o abi seks, mi be o fii taki wan sama lobi mi. Ma sani á waka enke fa mi be denki. Mi be e feele. Mi be e fii booko-saka.’
Bakaten Kylie wooko anga den sani di Beibel e taki fu seks. A taki: ‘Mi kon si taki den weiti fu Gadu e yeepi u fu koti pasi gi den ogii di sa miti u. Nownow mi e du sani enke fa Yehofa wani. Mi abi wan man di lobi mi. Ai booko en ede anga mi. Fu di mi be e wooko anga den sani di mi leli aini Beibel, meke mi be poi koti pasi gi omen sani di be sa hati mi bakaten.’
Efii wani sabi moo sani fu a toli ya, i sa luku a artikel a jw.org di den e kai ‘San Beibel e taki fu a libi di wan man anga uman e libi anga makandaa sondee den toow’?
A Sama di meke wi e yeepi u fu sabi san bun anga san á bun. Winsi a ná ala yuu a makiliki fu wooko anga den sani di ai leli u, toku wo fende wini efu u wooko anga den. A sani ya o meke u piisii tuutuu.