San gaanse sama e luku fosi den du wan sani?
Gaanse sama sabi taki son sani di sama e du bun, ma son sani di den e du á bun. Sani enke kii sama, a siibi di sama e siibi anga taawan anga taanga, anga a tyai di sama e tyai uman fasi a pikinnengee. Ma sama lobi te taawan e taki a tuu, te den e soi switifasi, anga te den e soi taki den e booko den ede anga taawan. Toku omen sama fende taki den sa du sani enke fa den wani te den e luku anga sama den o abi seks, efu den o taki a tuu, efuso fa den o kiya den pikin fu den. Den e du sani enke fa den fii anga fa den sani di den wani du o meke den sama fu den fii. Fa ye pakisei fu a toli ya? I si enke a wan bun sani te sama e du sani na a fasi ya?
U MU E DU SANI ENKE FAW FII?
Gaanse leisi we du sani enke faw fii. Son yuu te u mu du wan sani, we wooko anga saw kosensi taigi u. Bika u kosensi e yeepi u fu sabi san bun anga san á bun (Romesama 2:14, 15). Pikinnengee seefi sabi on ten wan sama e taki a tuu. Te den fusutan taki den du wan sani di á bun, ai hati den. Te we kon moo bigi, a den sama di wi anga den e de makandaa e leli u san bun anga san á bun. Te u mu du wan sani, u kosensi e piki u efu a sani di u wani du bun efuso efu aa bun.
Fu di u kosensi e soi u san bun anga san á bun, meke u poi soi taawan taki we booko wi ede anga den. We soi den tu taki u sabi kiyoo, we taki a tuu. Boiti dati, u kosensi e yeepi u fu wa du sani di o hati den sama fu u. Ai yeepi fu wa du sani di o meke sen kisi u.
Na ala yuu a bun fu du sani enke fa we fii? Wan yonkuman den e kai Garrick be lobi du sani enke fa a wani. Ma bakaten a kon si taki te a be e du sani enke fa a wani, sani á be e waka bun. A taki aa be e piisii fu a libi, bika a be e libi wan hululibi, a be e
somoko takuu tabaka, a be e diingi pasa peesi tu. Boiti dati, a be e du omen ogii.U MU DU SANI ENKE FA TAAWAN WANI?
Boiti taki we du sani enke faw fii, we luku fa taawan o fii fosi u du wan sani. A sani ya o yeepi u fu du sani anga koni. Te we du sani enke fa den famii efuso mati fu u wani, a sani ya sa meke den e lesipeki u.
Na ala yuu a bun fu du sani enke fa taawan wani? Wan yonkuu-uman den e kai Priscila be gwenti du sani enke den mati fi en. A be e abi seks winsi fa aa toow. Winsi fa den mati fi en be e si enke a wan bun sani ai du, toku aa be e piisii. A taki: ‘A du di mi be e du sani enke fa taawan wani á be e meke mi fii bun seefiseefi. A sani ya meke mi du omen sani di á bun.’
SAW YEEPI U FU DU SANI ANGA KONI?
Te a abi fu du anga san bun efuso san á bun, a fasi we fii anga fa taawan e si sani sa yeepi u fu sabi saw mu du. Ma dati wawan á sai fu yeepi u fu du sani anga koni. Son yuu u sa du sani di sa hati wi anga taawan, bika wa be sabi saw de a bakapisi fu a sani di u be wani du (Odo 14:12). Winsi wi anga taawan e si enke wan sani bun, toku ogii sa miti u. Fosi son sani di sama be e du di den be e si enke sani di á bun, den e si den enke wan kowownu sani nownow. A so a de anga son sani di sama be e si fu bun sani tu. Nownow den e si den sani de enke sani di á bun.
Na ala yuu a fasi fa taawan e denki o yeepi u du sani anga koni?
Wan moo bun sani de di sa yeepi u fu sabi san bun anga san á bun? Weiti de di u sa wooko anga den aini a ten ya di o tyai wini giw?
Ai bigi giw taki wan sani de di e yeepi sama fu du sani anga koni, winsi pe den e tan. Aini a taa artikel wo si pe u sa fende leli di o yeepi u fu sabi san bun anga san á bun.