Wi e lobi son kado, kande fu di a wan bigiman gi wi en efuso wan sama di wi e lesipeki. Son kado á dii seefi, tokuso wi e lobi en. Kande a wan famii fu u di u lobi efuso wan mati fu u gi wi en. Na a sani ya be meke Jordan di kai aini a taa artikel be lobi a kado di Russell be gi en. Fa a toli ya mu meke u si a dede di Yesesi kon dede gi u?

A fosi sani, a taki Gadu „sende a wan kodo manpikin fi en kon a goontapu, fu a sa yeepi u fu fende a libi” (1 Yohanisi 4:9). Na a sani ya meke u lobi a kado ya. Sama á de di bigi moo Gadu. Wan psalm sikiifiman be sikiifi taki: „A yu di den e kai Yehofa, a yu wawan na a Moo Gaan Gadu fu hii goontapu” (Psalm 83:18). Sama á de di bigi moo Yehofa di be sa gi u so wan kado.

Du fu tu sani, Gadu a „wi Dda” (Yesaya 63:16). Saide u sa taki a sani ya? Bika neen gi u libi. Ai solugu u tu, leti enke fa wan bun dda e solugu en pikin. Gadu be e kai a foluku fi en Efrayim. A taigi den taki: „A ná Efrayim na a manpikin di mi lobi noh? . . . Mi e fii gi en. Winsi fa, mi o abi tyali ati anga en” (Yelemiya 31:20). A letiso Gadu e fii gi den sama di e dini en aini a ten ya. A Gadu meke u. En a u mati anga u Dda tu. Neen meke u mu teke den sani di ai du gi u fu bigi.

Te wan sama gi u wan kado fu di a lobi u, da ai bigi gi u. Ai bigi gi u tu te u sabi taki a ná sama dwengi en fu gi wi a kado. Wan sama di lobi gi taawan sani nai gi sama sani fu di a wani den gi en sani baka.

A di Yehofa lobi u, meke a sende en manpikin kon a goontapu fu dede gi u. Beibel taki: „Na a fasi ya Gadu soi taki a lobi u di a sende a wan kodo manpikin fi en kon a goontapu.” Saide a sende en kon a goontapu? „Fu a sa yeepi u fu fende a libi” (1 Yohanisi 4:9). A musu Gadu be musu du a sani ya? Nono. A ’paiman di Yesesi pai fu fii wi’ a wan fasi fa Gadu e soi u taki a abi „bun-ati.”—Romesama 3:24.

Saide a kado di Gadu gi u e soi taki a abi „bun-ati?” Beibel taki: „Tokuso Gadu soi wi taki a lobi u fu di a meke Kelestesi dede gi u, aladi u be de sondu sama ete” (Romesama 5:8). Gadu lobi u tuutuu, neen meke a yeepi u, bika wi a sondu sama di á poi yeepi useefi. Wi á be fiti fu fende a kado ya. Wi á poi pai Gadu baka tu. A kado di a gi u na a moo gaan sani di wan sama du fu soi taki a lobi taawan.

Te wan sama meke taanga moiti fu gi u wan kado, da ai bigi gi u. Te wan sama de kabakaba fu gi u wan sani di a be lobi tuutuu, da wi e moo lobi a sani di a gi u.

Gadu be „sende a wan kodo Manpikin fi en kon” (Yohanisi 3:16). Nawan sama á de di Yehofa lobi enke Yesesi, tokuso neen a sende kon dede gi u. Di Gadu be e meke hemel anga goontapu, Yesesi be de neen se e wooko anga en. ’A be e meke Yehofa piisii’ (Odo 8:30). Yesesi na a „Manpikin di a lobi”, a „abi denseefi manii fu Gadu di sama á poi si anga ain” (Kolosesama 1:13-15). Noiti ete tu sama be lobi denseefi so.

Tokuso Gadu á „mombii wi a wan kodo manpikin fi en” (Romesama 8:32). Na a moo bun sani di a be abi a gi u, bika a be lobi en manpikin moo ala taa sani.

Ai bigi gi u te wan sama gi u wan sani di wi abi taanga fanowdu. Kon u taki i siki tokotoko, ma wan deesi de di sa yeepi i, fu yu á dede. Ma i ná abi a moni fu bai en. Efu wan sama taigi i taki a o bai a deesi gi i, a o bigi gi i, ná so noh? Sani á be o de di be sa bigi gi i moo a sani ya.

„Leti enke fa Adan meke ala sama e dede, a so Yesesi o meke ala den sama di dede kon a libi baka” (1 Korentesama 15:22). Ala wi na Adan bakapikin, neen meke ala wi e „dede”. Wi á poi lon gi siki anga dede. Useefi á poi puu den sondu fu u, fu u toon Gadu mati. Enke sondu libisama, wi á poi meke taawan fende „libi.” Beibel e soi taki: „Winsi san den du, nawan fu den poi fii wan taa sama. Den á poi pai Gadu fu fii wan taawan . . . Noiti wan sama o poi pai en” (Psalm 49:7, 8). Wi abi yeepi fanowdu tuutuu, bika useefi á poi pai a paiman fu komoto aini sondu. Efu ná Gadu be yeepi u, noiti u be o fende yeepi.

A di Gadu lobi u tuutuu, meke a pai fu a „deesi” gi u fu wi á dede. Na a deesi ya meke u „fende libi baka”. Fa a dede fu Yesesi e meke u fende libi baka? A buulu fu „Yesesi, e kiin ala den sondu fu u”. Te wi e biibi taki a buulu fu Yesesi e tyai wini  gi u, da Gadu o gi u paadon fu u sondu. A o gi u teego libi tu (1 Yohanisi 1:7; 5:13). Sowtu wini den sama di dede o fende fu a dede fu Yesesi? „A wan sama meke dede kon a goontapu, neen meke a wan sama [Yesesi] o meke dede sama weki baka tu.”—1 Korentesama 15:21. *

Noiti Gadu be gi libisama wan kado di bigi enke a dede di Yesesi dede gi u. Taa sama á soi u taki den lobi u na a fasi ya ete. Nawan sama meke a moiti di Gadu meke ya. Winsi sowtu kado wan sama be o gi u, a á be o doo a sani di Gadu du, bika a dede fu Yesesi e fii wi fu sondu anga dede. Neen meke nawan kado de enke a kado di Gadu gi u.