„A BESI sa go, ma a Sineisi ná o gwe!” Na a sani ya Alexandra yee di a be sidon aini wan besi e wakiti fu a go a wan taa kondee aini Zuid-Ameekan. Di a opo go luku san e pasa, neen a si fa wan Sineisiman e meke moiti fu taki Sipanyoo anga a suudati di be e luku sama e kon aini a kondee. Alexandra be e go a wan kemeente fu Yehofa Kotoigi pe den be e taki Sineisi, neen meke a taki a be sa yeepi a Sineisi fu taki anga a suudati.

A Sineisiman be taki en a fu a kondee, ma den be fufuu den pampila fi en anga ala en moni. Biginbigin a suudati á be wani biibi. A be e denki taki Alexandra be wani kibii tyai a Sineisi kon aini a kondee fu wooko enke saafu. Te fu kaba a biibi den, ma a Sineisi be mu pai wan butu, bika a á be de anga nawan pampila. A á be abi moni, neen Alexandra leni en 20 Ameekan dala. A man á be sabi fa fu gi en daa. A taigi en taki a be o gi en a moni baka, anga wan pikin sani a tapu. Alexandra piki en taki a á be de fanowdu fu a pai en. A wani a be wani yeepi en, bika a si taki a be de fanowdu. A gi a man wantu buku di e taki fu Beibel, neen a gi en taanga-sikin fu sutudeli Beibel anga den Yehofa Kotoigi.

Ai moin te yu e yee fa sama e yeepi taawan di den á sabi seefiseefi. A omen sama e du a sani ya. Son wan fu den a kelikiman, ma taawan nai go a keliki seefi. I be o de kabakaba fu yeepi wan sama di yu á sabi? A wan sani di u mu sidon denki, bika Yesesi be taki: „Wan sama di e gi taawan sani o fii moo koloku moo enke te taawan e gi en sani” (Toli 20:35). Ondoosukuman seefi kon si taki a bun gi i gusontu te yu e gi sama sani. Meke u luku fa.

A omen ondoofenitoli e soi taki wan sama e de koloku te ai gi taawan sani. Apostel Pawlesi be sikiifi taki: „Gadu lobi wan sama di e gi sani anga piisii.” A be e taki fu den Kelesten di be e yeepi baala anga sisa di be de a nowtu (2 Korentesama 8:4; 9:7). Pawlesi á taki a di den be de koloku meke den be e gi taawan sani, ma a taki a di den be e gi taawan sani meke den be de koloku.

A sani ya a tuu, bika ondoosukuman kon si taki te sama lobi gi taawan sani, den e fii moo bun, den e wani libi bun anga taawan. Boiti dati, den e de koloku. Wantu taa ondoosukuman be kon si taki te sama e gi taawan moni, da den e fii moo koloku moo enke te den e bai sani gi denseefi.

Kande yu o si enke yu á poi gi sama moni te iseefi ná abi ipi. Ma ala sama sa de wan „sama di e gi sani anga piisii”. Efi i wani gi sama sani tuutuu, da a á de fi i abi tyaipi moni  fosi. Wan Yehofa Kotoigi be sende wan bosikopu anga wan pikin moni gi den sama di e meke A Wakititolen ya. A be sikiifi taki: „Ala den yali ya a pikinso moni namo mi be e poi poti aini den pikin kedee di de aini a Kownukondee zaal. Ma Yehofa gi mi moo enke san mi gi. . . . Gaantangi fu u taki mi sa gi wi a moni ya. Ai meke mi fii bun.”

A ná moni wawan i sa gi taawan. A omen taa sani de ete di i sa gi sama.

Beibel taki: „Wan man di e libi bun anga taawan e fende wini, ma ogii o miti wan sama di e libi a wan ogii-ati fasi” (Odo 11:17). Sama di e libi bun anga taawan lobi gi taawan sani. Den lobi meke ten gi taawan, yeepi taawan anga sani efuso solugu taawan. Wan sama di e libi na a fasi ya e fende omen wini. Wan fu den wini, a taki sani o go bun anga a gusontu fi en.

Ondoosukuman kon si taki sama di lobi yeepi taawan nai abi pen lawlaw enke den sama di nai du a sani ya. Den nai kusumi enke taa sama tu. Sani e go bun anga a gusontu fu den. Winsi wan sama e siki gaan siki enke Aids, tokuso sani e go moo bun anga en te a lobi gi taawan sani. Den ondoosukuman kon si tu taki wan sopiman di wani tapu anga a diingi di ai diingi, e fii moo bun te ai yeepi taawan. A ná o pasa makiliki taki so wan sama e bigin diingi sopi baka.

Ma saide a de so? Sama kon si taki te yu e booko yu ede anga taawan, te i lobi yeepi taawan, da i nai abi ten fu pakisei sani di á bun. I nai booko yu ede tumisi anga sani. Efi i buulu hei, ai saka tu. Wan sama di uman efu man dede, e kisi enseefi moo gaw te ai yeepi taawan.

A ná abi misi. A omen wini yu e fende te yu e du sani gi taawan.

Yesesi be taigi den bakaman fi en taki: „I mu gwenti gi sama sani, da sama o gi i sani tu. Den o lai wan bakisi te a lai, den o pampan en te a á poi moo, da den kandi en go aini a saka fu u koosi. Bika a fa yu e libi anga taawan, a so sama o libi anga i” (Lukasi 6:38). Te yu e gi taawan sani, den e teke en fu bigi. Denseefi o teke a gwenti fu gi taawan sani. A sani ya o meke yu anga taawan wooko switi anga useefi. Wi e toon bun mati tu.

Ondoosukuman kon si taki te sama gwenti du sani gi taawan, da taa sama e wani waka a den baka. Den taki winsi a leisi wan sama e leisi fa sama e yeepi taawan, a o wani yeepi taawan tu. Wan taa ondoosuku soi taki te wan sama gwenti du sani gi taawan, da a omen taawan di a á sabi seefi, e waka neen baka tu. A sani ya e soi taki a wan pikin sani namo wan sama sa du gi taawan, da omen sama e wani du aseefi sani tu. Yu á be o wani tan a wan peesi pe ala sama  e libi so anga denseefi noh? A omen wini u be o fende efu moo sama be lobi du sani gi taawan.

Wantu Yehofa Kotoigi be go yeepi a Florida aini Ameekankondee di wan gaan daaiwinta be poli omen sani. Di den be e wakiti den sani di den be abi fanowdu fu seeka wan osu fu wan Kotoigi, neen den si taki a sikotu fu wan dyali neen se be booko. Den akisi a sama efu den be sa yeepi en seeka en. Bakaten a sama sikiifi wan biifi go na a edekantoo fu gi den Kotoigi daa. A sikiifi taki: „A sani di u du ya e bigi gi mi. Mi á si sama di e libi switi anga taawan so ete.” A sani ya meke a man sende wan moni fu holibaka gi a wooko di Yehofa Kotoigi e du a hii goontapu.

A omen ondoosuku e soi taki libisama meke anga a fii fu yeepi taawan. Den ondoosuku ya e soi taki pikinengee di á poi taki ete abi a fii ya tu. Saide? Beibel e soi u taki a fu di „Gadu meke libisama enke fa enseefi de”. Neen meke libisama abi denseefi manii fu Gadu.—Genesesi 1:27.

Wan fu den moin fasi fu Yehofa Gadu, na a lobi di a lobi gi sama sani. A gi u libi anga ala sani di wi abi fanowdu fu de koloku (Toli 14:17; 17:26-28). Te wi e sutudeli Beibel, a Wowtu fu Gadu, da wi e kon sabi en moo bun. Wi e kon sabi den sani di a o du tu. Beibel e soi tu san Gadu o du fu u sa de koloku aini a ten di e kon * (1 Yohanisi 4:9, 10). Yehofa Gadu e gi sama sani anga en hii ati. A meke u na aseefi fasi tu. Neen meke wi á mu foondoo taki wi o fende wini te wi e gi sama sani. Yehofa Gadu o piisii anga u tu.—Hebrewsama 13:16.

I sabi Alexandra ete, di u be taki fi en na a bigin fu a artikel? Fa sani waka anga en? Wan sama aini a besi be taigi en taki a sosokaali a lasi a moni de. Ma a Sineisiman be telefon wantu mati fi en aini wan fu den foto pe a besi be o pasa, neen den mati ya tyai a 20 dala gi Alexandra. A man be bigin sutudeli Beibel tu enke fa Alexandra be taigi en. Alexandra be piisii di a si a man ya baka dii mun a wan Konkelesi fu Yehofa Kotoigi aini Peru. Den be e holi a konkelesi ya aini Sineisitongo. A man ya be wani soi taki a sani di Alexandra du be bigi gi en, neen meke a kai Alexandra anga den sama di be kon anga en fu kon neen restaurant.

Wi e fii bun te wi e gi sama sani anga te wi e yeepi den. Ma sama e fende moo wini te wi e yeepi den fu sabi a sama di e gi u ala bun sani. A sama ya a Yehofa Gadu (Yakowbesi 1:17). Yu e piisii fu yeepi taawan na a fasi ya?