Na a bigin u be taki fu Krusus di be meke a lukuman fu Delfi fende en koli. A sani ya be meke a kownu fu Persiya wini en. Ma Beibel be taki wan sani a fesi fu a kownu fu Persiya. A sani ya pasa leti enke fa Beibel be taki.

Wan sani fu 200 yali a fesi, neen a Hebrew polofeiti di den e kai Yesaya kai a nen fu a kownu di be o wini a foto Babilon. A be taki a Sirus be o wini a foto ya. A be taki finifini fa a be o wini a foto ya tu.

Yesaya 44:24, 27, 28: „Yehofa, . . . taigi a gaan liba taki: ’Dee! Mi o meke ala den liba fi i dee.’ A mi taigi Sirus taki: ’En a mi sikapuman. A o du ala san mi wani.’ A mi taigi Yelusalem taki: ’Sama o meke en baka.’ Mi taigi a tempel taki: ’Den o sete i fondamenti baka.’”

A Giiki ondoosukuman di den e kai Herodotus taki Sirus be meke den suudati fi en diki wan gotoo fu meke a wataa fu Eufraat-liba di be e lon pasa a foto Babilon, lon go a wan taa se. A sani ya be meke den suudati fi en be man waka abaa a liba go a Babilon. Di Sirus wini Babilon, neen a meke den Dyu di be de a katibo a Babilon go a Yelusalem fu meke en baka. A 70 yali langa Yelusalem be booko.

Yesaya 45:1: „Mi Yehofa holi mi salufuwan Sirus neen leti-ana fu tyai en go wini den foluku. Mi o meke a wini den kownu. Mi o opo den tu gaan doo fu a foto, fu a foto sa de opo-opo gi en te a kon.”

Den Persiya suudati waka a den gaan doo fu a sikotu go aini a foto Babilon. Den Babilonsama be fika den doo ya opo-opo. Efu den be sabi san Sirus be o du, den be o tapu ala den gaan doo fu a foto di be de a wataa mofu. Ma san u sabi a taki sani á be de fu tapu Sirus anga den man fi en fu den á wini a foto ya.

Boiti a polofeititoli ya, a omen taawan sikiifi aini Beibel di pasa pilisisi enke fa den polofeiti be taki. a Den sani di libisama e taki fu a ten di e kon, a den falisi gadu fu den e taigi den. Ma a Gadu di taki den polofeititoli di sikiifi aini Beibel taki: „Fanafu a bigin mi e taki san o pasa. A omen ten a fesi mi e taki san mi o du aini a ten di kon.”​—Yesaya 46:10.

Na a tuutuu Gadu wawan poi taki a sani ya. En nen a Yehofa. A nen ya wani taki „mi o toon iniiwan sani di mi wani toon”. A sani ya e soi taki a poi sabi a fesi san o pasa. A poi meke sani pasa enke fa  a wani tu. A o du ala den sani di a paamisi. A ná abi misi.

I wani sabi san Beibel be taki o pasa aini a ten fu u? Wan sani fu 2000 yali pasa, Beibel be taki „aini den lasiti dei, a libi o taanga”. San a den lasiti dei ya? Den lasiti dei á wani taki goontapu anga libisama ná o de moo. Den wowtu „lasiti dei” e soi taki sani enke sitee libi, a fooseli di sama e fooseli taawan anga a pina di libisama e pina omen dunsu yali kaba, ná o de moo. Meke u luku wantu fu den sani di Beibel be taki o pasa aini den „lasiti dei”.

2 Timotiyesi 3:1-5: „Aini den lasiti dei . . . , sama o lobi denseefi pasa peesi. Den o lobi moni. Den o lobi gafa. Den o abi heimembee. Den o go e taki ogii fu taawan. Pikin ná o teke taki. Sama ná o sabi kiyoo. Den o gwe fika taawan. Den ná o lobi taawan. Den ná o wani meke kuudei. Den o go e lei gi taawan. Den ná o poi holi denseefi. Den o go e du ogii anga taawan. Den ná o lobi bun sani. Den o go e konkuu. Den o du san den wani. Den o go e fii enke den bun moo taawan. Den o lobi piisii pe fu den lobi Gadu. Den o taki den e dini Gadu, ma den libi o soi taki den nai dini en.”

Yu a si enke dei fu dei sama e moo tyai denseefi enke fa a tekisi ya taki noh? Yu á si enke sama di lobi denseefi pasa peesi, sama di lobi moni anga sama di abi heimembee lai na a goontapu noh? Aini a ten ya sama lobi sitee anga taawan. Den nai taki fiti. Na so noh? I musu e si tu fa pikin nai aliki den gaansama fu den, anga fa sama lobi piisii moo Gadu. Dei fu dei ai moo ogii.

Mateyesi 24:6, 7: „Wi o go e yee taki feti e feti. Wi o go e yee nyunsu taki kondee e feti. . . . A wan nasi o opo feti anga wan taa nasi, a wan kownukondee o opo feti anga wan taa kownukondee.”

Son sama taki fanafu 1914 te anga now, a pasa 100 miliyun sama di dede aini feti. Den sama di dede aini den feti ya, ipi moo den sama di e tan aini son kondee. Pakisei fa sama e kee, e kusumi anga fa sama e pina fu di miliyunmiliyun sama e dede aini feti. A goontapu kisi koni di den si san feti e du anga libisama? Den puu a feti di den kondee e feti anga denseefi?

Mateyesi 24:7: ’Angiiten o de.’

A olikanisâsi di e paati nyanyan gi sama di pooti (WFP) taki: „Aini a ten ya, a nyanyan di de a goontapu sai gi ala sama. Ma toku a 815 miliyun sama e siibi anga angii ala dei. Te i teli neigin sama a hii goontapu, da wan fu den e go siibi anga angii ala dei. Boiti dati te i teli dii sama, da wan fu den siki fu di a nai nyan bun.” A olikanisâsi ya taki a wan sani fu dii miliyun pikinnengee e dede fu angii ala yali.

Lukasi 21:11: „Seke-doti o de a omen peesi.”

Ala yali a wan sani fu 50.000 leisi doti e seke te da sama e fii en. Wan sani fu 100 fu den seke-doti e booko osu. Ala yali wan gaan seke-doti e de. Wan ondoosukuman taki fu a yali 1975 te anga 2000, a moo enke 471.000 sama seke-doti kii.

Mateyesi 24:14: „A bun nyunsu fu a Kownukondee fu Gadu mu paati na a hii goontapu meke ala sama yee. Baka dati a kaba o kon.”

A moo enke aitin miliyun Yehofa Kotoigi de a hii goontapu. Aini wan sani fu 240 kondee den e paati a bun nyunsu fu Gadu Kownukondee. Den e paati a nyunsu ya aini den gaan foto, den kampu, a busikondee anga den mongo pe sama e tan. Beibel taki, di Gadu o si taki a wooko ya du sai, da „a kaba o kon”. San a sani ya wani taki? A sani ya wani taki libisama ná o tii kondee moo, ma a Gadu Kownukondee o tii a hii goontapu. San Gadu Kownukondee o du gi libisama te a o tii a goontapu? Leisi go doo, da yu o si san a o du.