MOO SO MOIN HOWPU Á DE! A Gadu di meke u paamisi taki a o meke u libi fu teego a goontapu ya. A omen sama nai biibi a sani ya. Den e taki: „Ala sama o dede wan dei. A so a libi de kaba.” Taawan e biibi taki u sa libi fu teego tuu, ma a ná a goontapu ya. Den taki a baka te wan sama dede te a go a hemel fosi, a sa fende teego libi. Fa yu e si a toli ya?

Fosi i piki, a be o bun fi i luku san Beibel e taki fu den dii akisi ya: Te i luku a fasi fa libisama meke, da on langa u be mu libi? San Gadu be abi a pakisei di a meke libisama anga goontapu? Saide libisama e dede?

Te u luku ala den sani di Gadu meke, wi e si taki a meke libisama a wan apaiti fasi. Saide u sa taki a sani ya? Beibel taki a libisama wawan Gadu meke „enke fa enseefi de” (Genesesi 1:26, 27). San a sani ya wani taki? A sani ya e soi taki Gadu meke libisama anga den manii fi en. Tu fu den manii ya a lobi anga a koti di den man koti kuutu a wan letifasi.

Boiti dati libisama man denki. Den poi sabi san bun anga san á bun. Den poi piisii te den e luku den sani di Gadu meke, te den aliki poku, te den si wan moin tembee anga te den yee wan nongo. Ma a moo pelensipali sani di ala libisama poi du, na a dini di den poi dini a Gadu di meke ala sani. Den sani ya e soi taki libisama anga meti a ná a wan.

A bun fu pakisei a sani ya: Gadu meke libisama fu u poi soi den manii fi en. U poi go a fesi aini a fasi fa wi e soi den manii ya tu. I denki Gadu be o meke u fu du den sani ya wantu yali namo? Nono. A meke u fu u sa soi den manii fi en anga fu libi switi a goontapu ya fu teego.

Son sama taki Gadu á be meke libisama fu libi fu teego a goontapu. Den taki a be meke goontapu fu sama tan neen wan pisiten, fu luku sama sa go tan a hemel fu teego. Efu a sani ya a tuu, a á be o gei enke a Gadu e meke ogii e pasa a goontapu noh? Ma a ná Gadu e meke ogii e pasa a  goontapu, bika Beibel taki: „Ala yuu ai du sani a wan letifasi. A wan Gadu di u sa biibi. A nai du ogii. Ai du sani a wan letifasi. Ai du sani anga wan kiin ati.”​—Deitolonomi 32:4.

Beibel e soi saide Gadu meke goontapu. A taki: „Hemel a fu Yehofa, ma a goontapu, a libisama a gi en” (Psalm 115:16). Gadu meke a moin goontapu ya gi libisama fu den tan fu teego. A poti ala san wi abi fanowdu a goontapu, fu u sa piisii fu teego.​—Genesesi 2:8, 9.

„Hemel a fu Yehofa, ma a goontapu, a libisama a gi en.”​—Psalm 115:16

Beibel e soi saide Gadu meke libisama tu. A be taigi a fosi man anga uman taki den mu ’meke pikin fuu a goontapu da den de basi fi en. Den be mu de basi fu ala sani a goontapu’ (Genesesi 1:28). A wan moin gaandi den be abi fu meke a hii goontapu toon wan paladeisi. Adan, Efa anga den pikin fu den be o libi fu teego a goontapu ya. A ná hemel den be o libi fu teego.

Efu Gadu be meke u fu libi fu teego, da saide wi e dede? Beibel e leli u taki wan fu den engel di Gadu meke be wani buuya a sani di Gadu be abi pakisei anga a goontapu. Den e kai a engel ya Saatan Didibii. Fa Saatan du a sani ya?

Saatan koli den gaansama fu u, Adan anga Efa neen den sitee anga Gadu. Saatan taki Gadu á wani gi den a okasi fu taki gi denseefi. Adan anga Efa holibaka gi Saatan. A so den gwe fika Gadu. Fa sani waka di den du a sani ya? Baka wan pisiten den dede, leti enke fa Gadu be taigi den. Den á be poi libi fu teego aini a Paladeisi a goontapu moo.​—Genesesi 2:17; 3:1-6; 5:5.

A sani di Adan anga Efa du e meke ogii e miti libisama te anga a dei fu tide. A Wowtu fu Gadu taki: „Wan man meke sondu de a goontapu, neen sondu tyai dede. Neen meke ala sama e dede, bika ala den abi sondu” (Romesama 5:12). A di a sondu fu den fosi gaansama fu u kisi u meke wi e dede. A ná Gadu be sete sani a fesi taki u mu libi wan pisiten, da u dede.

A sani di Saatan du aini Eden, á tapu Gadu fu du san a abi pakisei gi libisama anga goontapu. Gadu lobi u. Ai du sani a wan letifasi tu. Neen meke a suku wan fasi fu fii wi fu sondu anga dede. Apostel Pawlesi taki: „A paiman fu sondu a dede. Ma Gadu koboloiki Kelestesi Yesesi fu gi u teego libi enke kado” (Romesama 6:23). Gadu „sende a wan kodo Manpikin fi en kon, fu meke den sama di e biibi en á dede, ma den mu fende a libi fu teego” (Yohanisi 3:16). Yesesi be de kabakaba fu dede gi u fu u sa fende a libi di Adan lasi. a

Dyonson goontapu o toon wan paladeisi enke fa Gadu paamisi u. Efi i du san Yesesi taki, yu o fende wini fu a sani di Gadu paamisi u ya. Yesesi taki: „Doo pasa go aini a sumaa doo, bika a pasi di e tyai sama go dede baala, anga ala a bigi. A omen sama e waka na a pasi de. Ma a doo di e tyai sama go a teego libi nyoni, a pasi fi en sumaa, a wantu sama namo e fende en” (Mateyesi 7:13, 14). A de a yu efi i wani fende a libi ya. San yu o du?