Yu akisi iseefi kaba fa yu anga yu osufamii libi o de aini a ten di e kon? I si enke wi o gudu efuso o lobi useefi? I si enke wi o pina? I si enke wi o naki paati? I si enke yu o libi gaandi? A omen dunsu yali kaba sama e akisi denseefi den sani ya.

Aini a ten ya sabiman e ondoosuku fa libisama e tyai denseefi, fu man sabi fa sani o waka aini a ten di e kon. Son sani e pasa enke fa den taki, ma son leisi sani e waka taa fasi. Aini 1912, wan man di den e kai Guglielmo Marconi meke wan masini den e kai telegraaf. A man ya be taki: „A sende di sama o go e sende bosikopu gi taawan anga a sani ya, o meke kondee á feti anga denseefi moo.” Wan fesiman fu wan bodeleifi (Decca Record Company) di be e teke singiman a wooko, be denki taki sama á be o lobi den beni di e pee gitali moo, neen meke a á be wani wooko makandaa anga a beni di den be e kai the Beatles aini 1962.

A omen sama di wani sabi fa den libi o waka e go taki anga den sama di e luku sitali. Son sama e leisi den buku efuso kolanti di den sama di e luku sitali sikiifi. Taawan e go a lukuman. Den lukuman ya e luku kaita, nombuu efuso sama bee ana fu si fa wan sama libi o waka.

Aini a ten di pasa son sama be e go a lukuman fu sabi sani a fesi. Den lukuman ya be e taki na a gadu fu den be e gi den bosikopu fu gi sama. Son sama taki, aini a ten di pasa a kownu fu Lidiya di den e kai Krusus be sende kado gi wan lukuman a Delfi, wan peesi a Giikikondee. Krusus be wani sabi efu a be o wini di a be o go feti anga Sirus fu Persiya. A lukuman be taigi Krusus taki di a o go feti anga Sirus, wan gaan kondee o poli. Krusus be denki taki a be o wini, neen meke a go na a feti. Ma neen kondee na a gaan kondee di poli.

A lukuman á taki pilisisi san be o pasa. A sani di a taki á be abi nawan wini, bika yu á be poi sabi sowtu wan fu den kondee be o poli. Ná pikin sani miti Krusus di a biibi a sani di a lukuman taki. Ma fa fu den sama fu a ten ya di e meke moiti fu sabi fa sani o waka aini a ten di e kon? Den e fende wini?