A bun nyunsu fu a Kownukondee e paati na ala se fu goontapu enke fa Yesesi be taki a fesi (Mateyesi 24:14). A Beibel buku Daniyeli e soi taki a Gadu abi a Kownukondee ya. Wan polofeititoli sikiifi a kapitel 2 di e soi sowtu libisama tiimakiti efuso kownukondee be o tii goontapu. Ai bigin fanafu a ten di Babilon be e tii, te anga den tiimakiti fu a ten fu u ya. Vers 44 e soi san o pasa aini a ten di e kon. A sikiifi taki:

„Na a ten fu den kownu de, a Gadu fu hemel o sete wan kownukondee di sama ná o poi puu a pasi. Den ná o gi nawan taa foluku a kownukondee ya. A o booko ala den taa kownukondee ya pisipisi. A o puu den a pasi. A kownukondee seefi o tan fu teego.”

A polofeititoli ya e soi taki a Kownukondee fu Gadu o puu ala libisama tiimakiti, da sani o waka bun a goontapu. Fa a libi o de te Gadu o tii goontapu? Meke u luku wantu bun sani di o pasa te a o tii.

• FETI NÁ O DE MOO

  Psalm 46:9: „[Gadu] o tyai wan kaba kon a feti na ala se fu goontapu. A o booko den bo. A o booko den lansi pisipisi. A o boon den fetiwagi.”

  Nownow libisama e koboloiki den koni anga omen moni fu meke fetisani fu kii sama. Pakisei fa a libi be o de efu den be e koboloiki den sani ya fu seeka goontapu. A sani ya o pasa tuutuu te Gadu o tii goontapu.

• SAMA NÁ O SIKI MOO

  Yesaya 33:24: „Nawan sama di e tan ape o taki: ’Mi siki.’”

  Pakisei fa a libi o de te ati-siki, kanker, malaaliya anga taa sowtu siki ná o de moo. Ati-osu anga deesi ná o de fanowdu moo. Ala den sama di o de a goontapu a ten de o gusontu.

• ANGIITEN NÁ O DE MOO

  Psalm 72:16: „Tyaipi nyanyan o de a goontapu. Te a den mongo ede seefi nyanyan o de pasa maiki.”

  A doti o meke nyanyan sai gi ala sama. Ala sama o fende a nyanyan di den abi fanowdu. Sama ná o mangii moo fu di den ná abi sani fu nyan.

• PEN, TYALI ANGA DEDE NÁ O DE MOO

  Openbaring 21:4: „[Gadu] o dee den wataa ain fu den. Da dede, tyali, kee anga pen ná o de moo. Bika den fositen sani pasa kaba.”

   A sani ya wani taki sama o libi fu teego sondee nowtu aini a paladeisi a goontapu ya. Na a sani ya Yehofa, a Gadu di meke u paamisi u.

Yu e biibi taki den sani ya o pasa tuu? Gaanse sama wani fende a libi di Beibel paamisi, ma toku a taanga gi somen fu den fu biibi taki libisama poi libi fu teego. A sani ya nai foondoo wi, bika nawan sama á si a libi ya ete fu taigi u fa a de.

Libisama toon saafu fu sondu anga dede. A omen yali kaba wi e pina. Boiti dati a libi e taanga gi u tu. Neen meke omen sama e si enke a so a libi de kaba. Ma a ná a sani ya Yehofa Gadu be abi pakisei di a meke u.

Gadu wani u biibi den sani di a paamisi u. Neen meke a taki: „Den ná o daai kon a mi, solanga sani á pasa enke fa mi taki. Sani musu waka enke fa mi taki. Den sani di mi taki mu abi bun bakapisi.”​—Yesaya 55:11.

Beibel taki Yehofa Gadu „á poi lei” (Titesi 1:2). A o du ala den sani di a paamisi u. Neen meke u mu akisi useefi taki: Libisama o man libi fu teego tuutuu aini wan paladeisi? San u mu du fu u sa fende wini fu den sani di Gadu paamisi u? Den taa artikel fu a Wakititolen ya o piki den akisi ya.