EFU wan fu den gaan ogii ya miti i, kande yu e fii enke den sama ya: Kande i buuya. Kande yu á poi biibi taki a sani ya miti i. Kande yu e fii booko-saka tu. A omen fu den sama di den sowtu ogii ya miti nai fii fu libi moo.

Efi i lasi ala sani fu di wan gaan winta efuso wan taa ogii pasa a pe yu e tan, kande yu e fii enke yu á poi moo. Kande yu e fii enke a sosokaali i de a libi. Ma Beibel e soi u saide wi á mu gi abaa. Ai soi u saide u sa biibi taki sani o go moo bun aini a ten di e kon tu.

Peleikiman 7:8 taki: „A kaba fu wan toli bun moo a bigin fi en.” Te wan gaan ogii miti i, biginbigin kande yu e fii enke i ná abi nawan howpu moo. Ma efi i meke moiti saafisaafi fu sete i libi baka, sani o go bun anga i.

Beibel taki wan ten e kon pe „noiti moo wi o yee sama e bali kee fu di den de anga buduufu na ati” (Yesaya 65:19). A sani ya o pasa te a Kownukondee fu Gadu o meke a goontapu ya toon wan paladeisi (Psalm 37:11, 29). A ten de, noiti moo sani enke gaan wataa efuso gaan winta o du ogii anga sama. U ná o membee nawan sani moo di o meke wi e kusumi, bika Gadu paamisi taki: „Sama ná o membee den fositen sani moo. Den sani de ná o kon a den pakisei moo tu.”​—Yesaya 65:17.

Pakisei a sani ya: Te Gadu Kownukondee o tii goontapu, „sani o waka bun anga u”. Na a Kownukondee ya na a moo bun wan di de (Yelemiya 29:11). Yu o fende wini efi i sabi san Gadu Kownukondee o du? Sally di u be taki fi en aini a fosi artikel taki: „Te yu e pakisei den sani di a Kownukondee fu Gadu o du aini a ten di e kon, a sani de o yeepi i fi yu á tan pakisei den ogii di miti i. A o yeepi i tu fu meke moiti fu pasa den dei di de ai fesi.”

A be o bun fi i meke moiti fu sabi san a Kownukondee fu Gadu o du gi libisama. Efi i du a sani ya, yu o si taki winsi sowtu ogii miti i, howpu de. Yu o angii tu fu a ten di ogii ná o miti sama moo. Ma aini a ten ya, Beibel sa yeepi i fu holidoo winsi fa ogii miti i. Meke u luku wantu Beibeltekisi di sa yeepi i.