Te wan sama di i lobi dede
KANDE yu e kusumi fu di wan sama di i lobi dede. Kande yu e fii enke a yu wawan de. Kande yu e fii enke i ná abi fa. Kande yu ati e boon efuso yu e fii enke i be mu du wan sani fu yeepi en. Kande yu e feele tu. Kande yu e akisi iseefi efu a de fanowdu fu de a libi ete.
Te yu e kusumi fu di wan sama fi i dede, dati á wani taki i swaki. A sani de e soi taki i be lobi a sama fi i tuutuu. Ma i poi fende toosutu fu a tyali sani di miti i?
SAN YEEPI SON SAMA FU HOLIDOO
Winsi fa yu e fii enke noiti yu o fende toosutu fu a sani di miti i, toku den sani di sikiifi a ondoo ya sa yeepi i fu fii moo bun:
KEE TE KEE KISI I
A ná ala sama e tyali na aseefi fasi. Son sama e kusumi langa moo taawan. Ma toku te wan sama e kee, a sani ya e yeepi en fu a fii lekiti. Vanessa di u be kai na a bigin taki: „Te kee kisi mi, mi be e kee. A sani de be e yeepi mi fu fii moo bun.” Sofía pikin sisa be dede wanboowanboo. A taki: „Te mi be e pakisei san pasa a be e du mi ogii enke te yu e pii wan soo opo fu kiin. Ná pikin hati ai hati, ma na a sani de e yeepi a soo fu betee.”
TE YU E TAIGI TAAWAN FA YU E FII, YU E FII MOO BUN
A tuu taki son leisi yu e fii fu de i wawan. Ma te i de anga buduufu na ati, a de enke wan ibi di i wawan á poi tyai. Wan boi den e kai Jared abi 17 yali. Ai membee fa a be e fii di en dda dede. A taki: „Mi be e taigi taawan fa mi e fii. Mi á be e poi taigi den finifini fa mi e fii, ma mi be e fii bun te mi be taki anga wan sama.” Janice, di u be taki fi en na a fosi artikel taki: „Te mi be e taigi taawan fa mi e fii, a sani de be e toosutu mi. Mi be e fii taki den e fusutan mi. A sani ya be e yeepi mi fu mi á fii enke a mi wawan de.”
MEKE TAAWAN YEEPI I
Wan dataa taki: „Te wan sama di e kusumi meke mati efuso famii yeepi en gawgaw baka di wan sama di a lobi dede, ai moo makiliki gi en fu kisi enseefi.” Taigi i mati fa den sa yeepi i. Den wani yeepi i, ma son leisi den nai sabi fa den mu yeepi i.—Odo 17:17.
MEKE MOITI FI YU ANGA GADU TOON MATI
Tina taki: „Di kanker kii mi man, mi á be abi sama fu taigi den booko-ede fu mi moo, neen meke mi be e taigi Gadu ala sani. Ala mamanten mi be e akisi Gadu fu a yeepi mi fu pasa a dei. Mi á poi kai den somen fasi fa a yeepi mi.” Tarsha, be abi 22 yali di en mma dede. A taki: „Te mi e leisi Beibel ala dei, mi e fii bun. Ai yeepi mi fu pakisei sani di e gi mi taanga-sikin.”
PAKISEI A TEN DI DEN SAMA FI I DI DEDE O WEKI BAKA
Tina taki: „Biginbigin a howpu di mi be abi taki mi man o weki baka á be e toosutu mi, bika a nownow mi be abi mi man fanowdu, den dii boi fu mi be abi den dda fanowdu tu. Ma baka fo yali, neen mi kisi a howpu ya holi taanga. Ai gi mi taanga-sikin fu abi a howpu taki a man fu mi o weki baka. Te mi e pakisei fa a o de di mi o si en baka, mi e fii bun. A sani ya e meke mi piisii!”
Kande a o teke ten fosi yu o fii bun baka. Ma toku i sa leli wan sani fu Vanessa. A taki: „Son leisi yu e si enke noiti yu o fii bun moo, ma baka wan pisiten yu e kisi iseefi saafisaafi. I nai kusumi so moo.”
Winsi fa yu e angii fu si a sama fi i di dede, tokuso yu á mu gi abaa. Gadu o yeepi i fu abi bun mati di lobi i. A o yeepi i tu fu piisii baka. Dyonson Gadu o weki den sama di dede. A wani i fende a okasi fu baasa den lobiwan fi i baka. Da a pen di de a yu ati o betee fu teego!
