Dyonson, wan gaan sani o pasa a goontapu di o de enke wan gaan „daaiwinta”. Yesesi kai a sani ya a „gaan banowtu” (Mateyesi 24:21). Wi á poi lon gi a gaan banowtu, ma wantu sani de di u sa du fu pasa a ten ya libilibi. San u mu du?

Wan leisi di Yesesi be e leli sama a wan mongo, a be taigi den taki den mu „tan poti a Kownukondee fu Gadu anga en leti-du a fesi” (Mateyesi 6:33). Fa u sa du a sani ya?

Poti a Kownukondee fu Gadu a fesi. A sani ya wani taki a Kownukondee fu Gadu mu de a moo pelensipali sani aini u libi (Mateyesi 6:25, 32, 33). Saide u mu si a Kownukondee fu Gadu enke a moo pelensipali sani aini u libi? Bika libisama á poi puu den polobelema aini a goontapu ya. Na a Kownukondee fu Gadu wawan poi du a sani ya.

Suku en leti-du. U mu du ala san u poi fu libi enke fa Gadu wani. Saide u mu du a sani ya? Efu wi e libi enke fa useefi wani, sani ná o waka bun gi u (Odo 16:25). Ma efu wi e libi enke fa Gadu wani, wi o meke a piisii. Useefi o fende wini.​—Yesaya 48:17, 18.

Tan poti a Kownukondee fu Gadu anga en leti-du a fesi. Yesesi be taki son sama be o meke sani puu den pakisei. Den be o si enke a te den e meke tyaipi moni, da sani o go bun anga den. Taawan be o go e poti pakisei a den  polobelema fu a libi te, da den ná abi ten moo fu poti a Kownukondee fu Gadu a fesi.​—Mateyesi 6:19-21, 25-32.

Yesesi be paamisi taki den sama di e poti a Kownukondee fu Gadu a fesi, o fende ala san den abi fanowdu nownow. Aini a ten di e kon den o fende tyaipi belesi tu.​—Mateyesi 6:33.

Winsi fa den bakaman fu Yesesi aini a ten fu den apostel be e poti a Kownukondee fu Gadu anga en leti-du a fesi, tokuso Gadu á be puu ala den polobelema anga den booko-ede fu den. Ma Gadu be e belesi den. Fa a be e belesi den?

Den be e libi enke fa Gadu wani, neen meke den ogii di be e miti den sama di á be e aliki Gadu á be e miti den. Fu di den be e biibi taki a Kownukondee be o yeepi den, meke den be poi holidoo winsi san be e miti den. Gadu be gi den „a kaakiti di bigi pasa maiki”. Na a sani ya yeepi den fu holidoo.​—2 Korentesama 4:7-9.

Den Kelesten fu a ten fu den apostel be e poti a Kownukondee a fesi, enke fa Yesesi be taki. Den be e paati a bun nyunsu fu a Kownukondee na ala pe den be poi doo (Kolosesama 1:23). Sama a den sama di e du aseefi sani ya aini a ten ya?

Den Yehofa Kotoigi e paati a bun nyunsu na ala se fu goontapu, bika den sabi taki a á fika langa moo fu a Kownukondee fu Gadu poli a goontapu ya. Neen meke den e du ala san den poi fu du a sani di Yesesi be taki. A be taki: „A bun nyunsu fu a Kownukondee fu Gadu mu paati na a hii goontapu fu ala sama yee. Baka dati a kaba o kon.”​—Mateyesi 24:14.

San yu o du te i yee a bun nyunsu? Gaantangi meke moiti fu de enke den sama fu Bereya. Di apostel Pawlesi peleiki gi den, den be „teke a wowtu anga den hii ati”. Baka dati den go ondoosuku finifini luku efu den sani di den leli a tuu, neen den du san den leli.​—Toli fu den apostel 17:11, 12.

I sa du aseefi sani ya. Efi i poti a Kownukondee fu Gadu anga en leti-du a fesi, yu o fende wini nownow kaba, ma aini a ten di e kon i ná o feele moo taki ogii o miti i. Sani o go bun anga i.