Yesesi be taki: „Wan foluku o feti anga wan taa foluku, wan kownukondee o feti anga wan taa kownukondee. Gaan seke-doti anga angiiten o de a omen peesi. Takuu siki seefi o go e kii omen sama” (Lukasi 21:10, 11). Te ala den sani ya be o pasa na aseefi yuu da u be o sabi taki „a Kownukondee fu Gadu de koosube”. Den sani di a tekisi e kai ya e pasa na aseefi yuu? Den e pasa a hii goontapu? Meke u luku wantu sani di pasa kaba.

1. FETI

Aini 1914, wan gaan feti feti a hii goontapu. A sani ya á be pasa noiti ete. Na a hii goontapu sama fii den takuu bakapisi fu a feti ya. Den sama di e sikiifi fu sani di pasa a fositen taki a yali 1914 kengi a hii goontapu, bika aini a yali ya a Fosi Goontapu Feti bigin. Na a feti ya na a fosi leisi pe suudati koboloiki tyaipi fetiwagi, opalani di e towe bom anga gas di e kii sama. Bakaten, na a Du Fu Tu Goontapu feti den bigin wooko anga atoom bom. Fanafu a yali 1914, a omen feti feti a goontapu. Miliyunmiliyun sama dede aini den feti ya.

2. SEKE-DOTI

Wan buku (Britannica Academic) taki ala yali a wan sani fu 100 seke-doti e pasa di sa du ogii anga sama. Den sani di ondoosukuman (United States Geological Survey) poti a pampila fanafu a yali 1900 e soi taki ala yali a wan sani fu 16 gaan seke-doti sa pasa. Son sama fende taki a di sabiman meke sani di e yeepi den fu maiki den seke-doti di o pasa, meke ai gei enke moo seke-doti e pasa aini a ten ya. Winsi fa sama e si a toli ya, tokuso u sabi taki aini a ten ya moo sama e dede te wan seke-doti pasa. Seke-doti e tyai moo polobelema aini a ten ya tu.

 3. ANGIITEN

Te feti e feti aini wan kondee, te sama e bidiigi taawan, te wan kondee nai daai bun, efuso te a doti aini wan kondee nai meke nyanyan, da den sani ya e meke angiiten de aini wan kondee. Aini 2018, wan olikanisâsi fu Verenigde Naties (The World Food Programme) be taki: „A wan sani fu 821 miliyun sama e tan anga angii a hii goontapu. A 124 miliyun fu den sama ya e swaki te da den e de fu dede.” Fu di sama nai nyan gusontu nyanyan meke a wan sani fu 3.1 miliyun pikinnengee e dede ala yali. Beina afu fu den pikin di dede aini 2011, dede fu di den á be e nyan bun.

4. SIKI DI E KII TYAIPI SAMA

A olikanisâsi (World Health Organization) di e luku a gusontu fu sama a hii goontapu taki: „Fanafu a yali 2001, a omen siki di e kii tyaipi sama paati a goontapu. A omen siki di be de kaba, e kon baka. Siki enke cholera, pesti-siki anga gele koorts. Nyun siki kon tu. SARS, hebi feba di e paati na ala se, MERS, Ebola anga Zika a wantu fu den siki ya.” Winsi fa sabiman anga dataa fende nyun fasi fu deesi siki, tokuso den á poi fende deesi gi ala den siki ya.

5. SAMA BE O PELEIKI A HII GOONTAPU

Yesesi be kai ete wan sani di be o pasa fosi a Kownukondee fu Gadu bigin tii goontapu. A be taki: „A bun nyunsu fu a Kownukondee fu Gadu mu paati na a hii goontapu fu ala sama yee. Baka dati a kaba o kon” (Mateyesi 24:14). Winsi fa omen ogii e pasa a goontapu, tokuso moo enke aitin miliyun sama fu ala sowtu nasi e paati a bun nyunsu fu a Kownukondee aini 240 kondee. Den e paati a nyunsu ya aini moo enke 1000 tongo. Noiti ete a sani ya be pasa a goontapu.

Ala den sani di Yesesi be taki e pasa aini a ten ya. Saide u mu poti pakisei na a sani ya? Bika Yesesi be taki: „Te u si den sani di mi taigi u ya e pasa, da u mu sabi taki a Kownukondee fu Gadu de koosube.”​—Lukasi 21:31.

Te u luku den sani di Yesesi be taki o pasa, anga den taa polofeititoli aini Beibel, da wi e fusutan taki a Kownukondee fu Gadu bigin tii a hemel aini 1914. * Aini a yali de Gadu poti en Manpikin Yesesi Kelestesi enke Kownu (Psalm 2:2, 4, 6-9). Dyonson a Kownukondee fu Gadu o tii goontapu, da a o puu ala den taa tiimakiti a goontapu. Baka dati a o meke a goontapu toon wan paladeisi, da libisama o libi fu teego.

A á fika langa moo, da den sani di Yesesi be leli den bakaman fi en fu begi o pasa. A be taki: „Meke i Kownukondee kon. Meke sani waka enke fa i wani a goontapu ya, leti enke fa sani e waka a hemel” (Mateyesi 6:10). Ma san a Kownukondee du kaba senten di a bigin tii aini 1914? San a Kownukondee o du te a o tii hii goontapu?