Beibel e soi taki wan engel, di u sabi enke Saatan Didibii nownow, be fende taki Gadu ná abi a leti fu tii libisama, neen a sitee anga Gadu. A taki sani be o moo waka bun gi libisama efu Gadu á be e tii den. A tyali taki u fosi dda anga mma, Adan anga Efa aliki Saatan neen den taangayesi Gadu.​—Genesesi 3:1-6; Openbaring 12:9.

Di Adan anga Efa taangayesi Gadu, den soi taki den á be wani Gadu tii den moo. A sani ya meke Gadu puu den aini a moin dyali di a be meke gi den. Den lasi a howpu di den be abi fu libi fu teego tu enke sama di nai siki noiti (Genesesi 3:17-19). A sani di den du tyai ogii gi den pikin di den meke bakaten. Beibel taki a di Adan sondu „meke sondu de a goontapu, neen sondu tyai dede” (Romesama 5:12). Sondu tyai wan taa ogii gi libisama tu. Beibel taki: „Fanafu di libisama bigin tii taa libisama, sani nai waka bun gi den” (Peleikiman 8:9). A sani ya wani taki te libisama e tii denseefi, a soso polobelema ai tyai gi den.

A Nimrod na a fosi libisama tiiman di kai aini Beibel. A á be wani Gadu tii en. Fanafu a ten fu Nimrod, neen sama di abi makiti e pina taawan. Wan sani fu 3000 yali pasa, Kownu Salomo be sikiifi taki: „Mi si den wataa-ain fu den sama di taawan e pina, ma sama á be de fu toosutu den, bika den sama di be e pina den be abi makiti.”​—Peleikiman 4:1.

Na aseefi fasi sani e waka aini a ten ya. Aini 2009 wan buku fu den Verenigde Naties sikiifi taki moo anga moo ai kon a kiin taki „wan fu den moo gaan sani di meke ogii de a goontapu a den tiiman di nai tii bun”.

A goontapu abi bun tiiman fanowdu. Na a sani ya a Sama di meke u paamisi taki a o du.

Gadu sete wan Kownukondee efuso tiimakiti di o puu ala den taa tiimakiti, da en wawan o „tan fu teego” (Daniyeli 2:44). A omen miliyun sama e begi fu a Kownukondee ya kon (Mateyesi 6:9, 10). Ma a ná Gadu seefi o tii a Kownukondee ya. A poti wan sama di be e libi a goontapu fosi, enke tiiman fu a Kownukondee ya. Sama Gadu poti fu tii a Kownukondee ya?