• A Gadu seefi be o poti en enke Kownu. „A miseefi poti a kownu fu mi fu tii.” „Mi o gi yu a hii goontapu.”​—Psalm 2:6, 8.

• A be o de wan bakapikin fu Kownu David. „Den meke wan pikin gi u, u fende wan manpikin . . . A o tii na ala se enke wan gaanman. Te a o sidon na a kownusutuu fu David anga te a o tii a kownukondee fi en, sani o waka bun ala ten.”​—Yesaya 9:6, 7.

• A Betelehem a be o meke. „Ai, Betelehem . . . , wan tiiman o komoto aini yu. . . . A o abi makiti te a den moo faawe pisi fu goontapu.”​—Mika 5:2, 4.

• Sama be o buuse en, den be o kii en. „Den be e soso en. U be e si en fu wisiwasiman. . . . Den sutu en fu u sondu ede. Den pina en fu den ogii di u du.”​—Yesaya 53:3, 5.

• Gadu be o weki en baka, da a gi en makiti. „I ná o fika mi aini geebi. I ná o fika a sama di nai gwe fika i aini geebi-olo. . . . Te mi de a yu leti-ana, mi o piisii fu teego.”​—Psalm 16:10, 11.

A wan kodo sama ala den polofeititoli di u kai a tapu ya e fiti. A sama ya a Yesesi Kelestesi. Boiti dati, wan engel be taigi Maliya, a mma fu Yesesi taki: „Gadu o gi en a kownusutuu fi en dda David. . . . Noiti a Kownukondee fi en o booko.”​—Lukasi 1:31-33.

Noiti Yesesi toon tiiman a goontapu ya. A peesi fu dati, a de a hemel enke Kownu fu Gadu Kownukondee. Na anda a o de, da ai tii libisama. Saide Yesesi na a moo bun Tiiman di u be sa abi? Meke u luku san Yesesi du di a be de a goontapu.

•   Yesesi be e booko en ede anga sama. Yesesi be e yeepi ala sowtu sama. A be e yeepi mannengee, umanpikin, pikinnengee anga gaansama. A be e yeepi guduman anga pootiman tu (Mateyesi 9:36; Malikisi 10:16). Di wan kokobeman begi en taki: „A wani namo fi i wani baa, da yu o meke mi kon kiin”, tyali kisi Yesesi neen a deesi a man.​—Malikisi 1:40-42.

• Yesesi leli u san u mu du efu u wani Gadu lobi u. A taki: „Yu á poi dini Gadu anga Gudu na aseefi yuu.” A leli u tu taki a den sani di u wani taawan du gi u, u mu du gi den tu. Boiti dati, a leli u taki Gadu nai luku den sani di wi e du namo, ma ai luku fa wi e denki anga fa wi e fii tu. Neen meke efu u wani Gadu piisii, u mu e meke moiti ala yuu fu pakisei bun sani (Mateyesi 5:28; 6:24; 7:12). Yesesi leli u tu taki efu u wani piisii, u mu meke moiti fu sabi san Gadu wani u du. Te u sabi kaba, da u mu du den sani ya.​—Lukasi 11:28.

• Yesesi leli u san a wani taki fu lobi taawan. Den sani di Yesesi be e taki anga den sani di a be e du be e doo sama ati tuutuu. Beibel taki: „Den sama foondoo di den si fa a leli den, bika a be e gi leli enke wan sama di Gadu be gi makiti” (Mateyesi 7:28, 29). A leli den taki: „U mu lobi u feyanti.” Enseefi soi taki a be lobi en feyanti, bika a be begi gi den sama di be o kii en taki: „Nda gi den paadon, bika den á sabi san den e du.”​—Mateyesi 5:44; Lukasi 23:34.

Yesesi fiti fu tii libisama tuu, bika a abi bun manii. A lobi yeepi sama tu. Ma on ten Yesesi o bigin tii?