Aini a artikel di pasa, u be luku wantu sani di Yesesi be taigi den bakaman fi en taki be o pasa, te a Kownukondee fu Gadu be o bigin tii. Ala den sani ya e pasa nownow, neen meke u sabi taki a Kownukondee fu Gadu sete a hemel kaba. U sabi tu taki a Yesesi na a Kownu fu a Kownukondee ya.

Beibel e leli u taki di Yesesi be o bigin tii, a be o iti Saatan anga den ogii yeye fi en kon a goontapu. Saatan anga den ogii yeye de a goontapu nownow, neen meke den somen ogii ya e pasa a goontapu fanafu a yali 1914.​—Openbaring 12:7, 9.

Winsi fa a goontapu e kon moo ogii dei fu dei, tokuso Yesesi di e tii enke a Kownu fu Gadu Kownukondee, e yeepi sama a hii goontapu. Enke fa Yesesi be taki, da na a hii goontapu sama be o leli sani fu Beibel. A omen fu den sama ya e du den sani di den leli (Yesaya 2:2-4). Miliyunmiliyun sama a hii goontapu leli taki den á mu si a wooko fu den enke a moo pelensipali sani aini den libi. Den leli san den mu du fu den osulibi waka moo bun. Den leli tu taki den á mu feti a gudu baka. Den sama ya e fende wini fu den sani di den e leli. Te a Kownukondee fu Gadu o tii goontapu, a den sama ya o fende wini fu den sani di Gadu paamisi libisama.

Winsi fa Yesesi e tii aini hemel kaba, tokuso a libisama e tii a goontapu ete. Gadu be taigi Yesesi taki: „Go a den feyanti fi i, da i poti den a yu ondoo” (Psalm 110:2). Dyonson Yesesi o puu ala den feyanti fi en, da ogii ná o miti den sama di e libi enke fa Gadu wani moo.

San a Kownukondee fu Gadu o du dyonson?

• A o puu ala den falisi keliki. Beibel e maiki falisi keliki anga wan hulu-uman. Den keliki ya e leli sama omen lei fu Gadu. Den leli fu den keliki ya e fooseli sama, neen meke a Kownukondee fu Gadu o puu den a pasi. A omen sama o dyombo di a sani ya o pasa.​—Openbaring 17:15, 16.

• A o poli ala den libisama tiimakiti. A Kownukondee fu Gadu o poli ala den libisama tiimakiti.​—Openbaring 19:15, 17, 18.

• A o kii ala den ogii sama. San o pasa anga den ogii sama di á wani kengi? Beibel taki: „Gadu o kii den ogii sama puu a goontapu.”​—Odo 2:22.

• Saatan anga den ogii yeye ná o de moo. Saatan anga den ogii yeye fi en ná o „poi koli sama moo”.​—Openbaring 20:3, 10.

Sowtu wini den sama di e dini Gadu o fende te den sani ya o pasa?

Di Yesesi o tii goontapu, a o du omen sani gi libisama. Nawan libisama tiiman poi du den sani di Yesesi o du. Den 144.000 sama di o go a hemel, o tii makandaa anga Yesesi (Openbaring 5:9, 10; 14:1, 3). Yesesi o meke den sani di Gadu paamisi libisama kon tuu a goontapu ya. San a Kownukondee fu Gadu o du gi libisama?

• A o puu siki anga dede. „Nawan sama di e tan ape o taki: ’Mi siki’”, „dede ná o de moo”.​—Yesaya 33:24; Openbaring 21:4.

• Freide o de, ala sani o go bun. ’Sani o waka bun anga ala den pikin fi i.’ „Ala den o sidon a den doloifibon anga den figabon ondoo. Nawan sama o meke den feele.”​—Yesaya 54:13; Mika 4:4.

• Den o du wooko di o meke den piisii. „Den sama di mi teke o fende wini fu a wooko di den du. Den ná o wooko taanga fu soso.”​—Yesaya 65:22, 23.

• A doti o bun fu paandi. „Ná pikin piisii a sabana anga den peesi di ná abi wataa o piisii. A dee sabana o piisii, a o meke tyaipi boomiki.”​—Yesaya 35:1.

• A o leli sama san den mu du fu man libi fu teego. „Efu wan sama wani libi fu teego, da a mu sabi yu, a tuutuu Gadu, anga Yesesi Kelestesi, a sama di i sende kon a goontapu.”​—Yohanisi 17:3.

Gadu wani i fende wini fu den belesi ya (Yesaya 48:18). Wi o luku aini a taa artikel san i mu du fu fende wini fu den sani di Gadu paamisi u.