A goontapu o booko?
Kande i leisi a pisi aini Beibel di e taki fu a kaba fu a goontapu (1 Yohanisi 2:17). A sani ya wani taki libisama ná o de a goontapu moo? Efuso taki a goontapu o booko?
BEIBEL E TAKI A PIKI FU DEN TU AKISI YA A NONO!
San o de ete baka a kaba fu a goontapu?
LIBISAMA
San Beibel e taki: ‘A ná sosokaali Gadu meke a goontapu, ma a meke en gi libisama fu tan.’—YESAYA 45:18.
A GOONTAPU
San Beibel e taki: ‘Sama e dede gwe, taawan e kon, ma a goontapu e tan fu teego.’—PELEIKIMAN 1:4.
SAN A SANI YA WANI TAKI: Beibel e soi taki a goontapu ná o booko noiti. Noiti goontapu o de sondee libisama tu. Da san na a kaba fu a goontapu?
PAKISEI A SANI YA: Beibel taki a kaba fu a goontapu o de enke a sani di be pasa na a ten fu Nowa. A ten de ogii be lai a goontapu (Genesesi 6:13). Ma Nowa a wan man di be e du san bun ala yuu, neen meke Gadu kibii en anga en osufamii, di a kii ala den ogii sama anga wan Fuudu. Te Beibel e taki fu a sani di be pasa aini a ten fu Nowa ai taki: ‘Gadu be poli a goontapu fu a ten de anga wataa’ (2 Peitilisi 3:6). Dati a be a kaba fu wan goontapu. Ma san Gadu be poli? A ná a goontapu seefi a be poli, a den ogii sama a be kii. Neen meke te Beibel e taki a goontapu ya ná o de moo, a ná a goontapu seefi ai taki, ma a den ogii sama di e poli a goontapu.
San ná o de moo?
POLOBELEMA ANGA OGII
San Beibel e taki: ‘Dyonson den ogii sama ná o de moo. Yu o luku pe den be de fosi, ma den ná o de moo. Ma a den safu-ati sama o fende goontapu. Den o piisii fu a libi, bika ala sani o waka bun.’—PSALM 37:10, 11.
SAN A SANI YA WANI TAKI: A Fuudu fu a ten fu Nowa be kii den ogii sama di be de na a ten de. Ma bakaten a goontapu be lai anga ogii sama baka. Den sama ya e fooseli taawan. Beibel taki dyonson ogii sama ná o de moo. Na a Kownukondee fu Gadu o du a sani ya. A Kownukondee ya a wan tiimakiti di de a hemel. A o tii den sama di e aliki Gadu.
PAKISEI A SANI YA: I si enke den sama di e tii goontapu nownow o poolo di a Kownukondee fu Gadu o bigin tii? Beibel taki den ná o lobi a sani ya seefiseefi. Den o wani feti anga a tiimakiti fu Gadu (Psalm 2:2). San o de a bakapisi? A tiimakiti fu Gadu ‘o puu ala libisama tiiman, da enseefi o tii fu teego’ (Daniyeli 2:44). Ma saide Gadu abi fu puu ala libisama tiiman?
SAN WI ABI FANOWDU—Wi abi taa tiiman fanowdu
San Beibel e taki: ‘Libisama á sabi sowtu pasi den mu waka. A ná denseefi mu taki pe den mu poti den futu.’—YELEMIYA 10:23.
SAN A SANI YA WANI TAKI: Gadu á be meke libisama fu tii denseefi, neen meke te libisama e tii taa libisama, a soso ogii e pasa. Den nai poi losi den polobelema fu den.
PAKISEI A SANI YA: Wan buku e taki: ‘Efu a wan tiimakiti namo be e tii hii goontapu da kande a be sa puu sani enke siki, angii, pina, feti, ogii, efuso taa sani di e miti libisama.’ Ma fu taki en kiin, dati seefi á be o yeepi. Winsi ala den tiimakiti fu goontapu be o kon a wan fu wooko makandaa, toku den á be o poi puu son wan fu den polobelema fu libisama, bika den a sondu sama enke useefi. Na a tiimakiti fu Gadu wawan too poi puu ala den polobelema fu libisama.
Ma i ná abi fu feele te Beibel e taki fu a kaba fu a goontapu. A sani ya a sani fu piisii, bika Gadu paamisi u taki a o seeka a ogii goontapu ya kon toon wan moin paladeisi.
On ten a sani ya o pasa? A taa artikel o piki a akisi ya.
