San i mu du efi i wani doo aini a nyun goontapu?

PEE

Aini a artikel di pasa, u be si taki Gadu o poli a ogii goontapu yaaso. A o puu ala den polobelema di libisama abi tu. Saide i sa biibi taki a sani ya o pasa tuu? I sa biibi den sani ya, bika Gadu paamisi wi aini en Wowtu Beibel taki:

‘A goontapu ya ná o de moo.’—1 YOHANISI 2:17.

Ma winsi fa a goontapu ya ná o de moo, toku sama de di o pasa go aini a nyun goontapu libilibi, bika a lasiti pisi fu aseefi tekisi ya e taki:

‘Den sama di e libi enke fa Gadu wani o libi fu teego.’

Neen meke efi i wani tan a libi te Gadu o poli a goontapu ya, da i mu e du sani enke fa a wani. Ma efi i wani du sani enke fa Gadu wani, i mu sabi en fosi.

EFI I WANI TAN A LIBI, I MU KON SABI GADU

Yesesi be taki: ‘Efu wan sama wani libi fu teego, da a mu sabi yu, a tuutuu Gadu’ (Yohanisi 17:3). U mu meke moiti fu sabi Gadu efu u wani tan a libi. A ná wantu sani fi en namo u mu sabi. U mu meke moiti fu toon en mati. Leti enke fa i be o meke ten gi wan sama di i wani enke i mati, a so i mu meke ten fu kon sabi Gadu moo bun. Meke u luku wantu sani aini Beibel di o yeepi u fu toon Gadu mati.

Den sani di wi e leli aini Beibel

Wi e leli taki di Gadu be meke libisama, a be wani u libi fu teego aini wan paladeisi.

Di a meke den fosi libisama Adan anga Efa, a poti den aini wan moin peesi den be e kai Eden. Den sama ya á be abi sondu. Gadu be gi den ala san den be abi fanowdu fu abi wan bun libi. Efu den be aliki Gadu, da tide na a dei den be o de a libi ete. Ma den á du san Gadu be taigi den.

Beibel e soi saide libisama e pina.

Di Adan taangayesi Gadu, a lasi a okasi di a be abi fu libi fu teego. Ma a neen wawan fii den bakapisi fu a sani di a du. Den bakapikin fi en seefi be lasi a okasi fu libi fu teego. Beibel e taki: ‘Wan man meke sondu de a goontapu, neen sondu tyai dede. Neen meke ala sama e dede, bika ala den abi sondu’ (Romesama 5:12). Leti enke fa wan sama sa kisi wan siki di de aini en famii, a so ala den bakapikin fu Adan kon abi sondu, fu di Adan be sondu. Na a sani ya meke wi e gaandi, da wi e dede.

Beibel e soi u san Gadu du gi u kaba.

Ai taki: ‘Gadu be lobi goontapu te, neen a sende a wan kodo Manpikin fi en kon dede gi u, fu meke den sama di e biibi en fende teego libi’ (Yohanisi 3:16). Gadu sende Yesesi kon a goontapu fu dede gi wi enke libisama. Wan man den e kai Prabhakar di abi 86 yali taki: ‘A sani di Gadu du ya e soi taki a lobi mi tuutuu. A di Yehofa a lobi mi meke mi abi a howpu fu libi fu teego aini a ten di e kon.’

Beibel e soi u san u mu du fu soi taki wi e teke a sani di Gadu du gi u fu bigi.

Wan fasi fa u sa soi taki wi e teke a sani di Gadu du gi u fu bigi, a te wi e ‘holi den weiti fi en’ (1 Yohanisi 2:3). Yehofa Gadu soi u san u mu du efu u wani u libi waka bun nownow kaba (Yesaya 48:17, 18). Gadu á wani u pina. A paamisi u taki efu wi e wooko anga den sani di ai leli u, u libi o moo waka bun. Boiti dati, wi o fende a okasi fu libi fu teego aini a ten di e kon.

I MU E LEISI A WOWTU FU GADU ALA DEI

Efi i wani tan a libi te Gadu o poli a goontapu, i mu e begi en ala yuu, i mu e du san a taki tu

Na ala dei wi e nyan fu man tan a libi. Ma Yesesi be taki: ‘Sama á mu libi fu beele wawan, ma fu ibii wowtu di Yehofa mofu taki.’—Mateyesi 4:4.

A te wi e leisi a Beibel da wi o sabi san Gadu taki. Te yu e leisi Beibel, yu o kon sabi san Gadu be du gi libisama aini a ten di pasa, san ai du gi u nownow, anga san a o du gi wi aini a ten di e kon.

BEGI GADU FU A YEEPI I

San i mu du te ai taanga gi i fu du san Gadu wani? I mu meke moiti fu kon sabi en moo bun. Te yu anga Yehofa a mati, a o moo makiliki gi i fu du san a taki.

Luku a toli fu wan uman di be e libi wan hululibi fosi. Di a bigin sutudeli Beibel a kon leli taki Gadu á lobi den sowtu fasi fu libi de (1 Korentesama 6:18). Neen meke a begi Gadu fu a yeepi en. Toku a ná ala yuu ai makiliki gi en fu holi enseefi. A taki: ‘Son yuu te mi e denki fu du sani di Yehofa á lobi, mi e begi en da mi taigi en fa mi e fii, bika mi sabi taki mi wawan á poi feti a feti ya. A begi di mi e begi Yehofa yeepi mi fu mi anga en toon moo bun mati.’ Leti enke a uman ya, a omen miliyun taa sama Gadu e gi a kaakiti di den abi fanowdu fu libi enke fa a wani.—Filipisama 4:13.

Te yu e meke moiti fu kon sabi Gadu moo bun, da enseefi o si yu enke en mati (Galasiyasama 4:9; Psalm 25:14). Efi yu anga Gadu a mati, yu o doo aini a nyun goontapu. Fa sani o de aini a nyun goontapu ya? A taa artikel o taki fu a pisi de.

a Yehofa na a nen fu Gadu enke fa a sikiifi aini Beibel.

Yehofa Kotoigi

San i mu du efi i wani doo aini a nyun goontapu?

EFI I WANI TAN A LIBI, I MU KON SABI GADU

I MU E LEISI A WOWTU FU GADU ALA DEI

BEGI GADU FU A YEEPI I

You May Also Like

A omen sama o tan a libi te a kaba o kon—iseefi sa tan a libi tu