Dyonson moo di a tiimakiti fu Gadu o tii hii goontapu, ala sama o go e libi na a wan. Den o go e du wooko di e meke den piisii. A Yesesi Kelestesi Gadu o poti fu tii a goontapu ya. U sabi taki den tiiman fu nownow nai booko den ede anga a foluku. Ma Yesesi o solugu taki sani waka bun anga ala den sama di a o tii. Fu di Yesesi anga en Dda lobi u, meke a o go e du sani a wan letifasi ala yuu.​—Yesaya 11:4.

Di wi o de aini a nyun goontapu, sama ná o go e paati bee moo. Son kondee ná o pelensipali moo taawan. A wan nasi sama ná o si enke a bun moo a taawan (Openbaring 7:9, 10). Ala den sama di o de a goontapu a ten de, o lobi Gadu anga taa sama. Den o go e wooko makandaa fu solugu a goontapu di Gadu gi den.​—Psalm 115:16.

Di a Kownukondee fu Gadu o tii hii goontapu, sani enke gaan winta anga seke-doti ná o du ogii anga libisama moo (Psalm 24:1, 2). Di Yesesi be de a goontapu a be soi kaba taki a poi basi a se anga a winta (Malikisi 4:39, 41). Di Kelestesi o bigin tii, nawan sama o abi fu feele den sowtu sani ya moo. Libisama, meti anga ala den taa sani di de a goontapu o go e libi na a wan baka, enke fa Gadu be meke den na a bigin.​—Hoseya 2:18.

Na a ten de, nawan sama o go e siki, gaandi, efuso dede (Yesaya 35:5, 6). A goontapu o moin enke a dyali di Gadu be meke gi u fosi mma anga dda. Nyanyan o lai a goontapu, nawan sama o go e de anga angii moo (Genesesi 2:9). Leti enke den Islayelisama, a foluku fu Gadu a fositen, a so den sama aini a paladeisi o go e nyan te den bee fuu.​—Lefitikesi 26:4, 5.

Di a Kownukondee fu Gadu o tii hii goontapu, ala sama o go e libi bun anga denseefi. Feti ná o de moo, tiimakiti ná o de moo di e fooseli sama. Boiti dati, ala sama o abi ala san den abi fanowdu fu tan a libi. Beibel taki: ‘Ala den o sidon a den doloifibon anga den figabon ondoo. Nawan sama o meke den feele.’​—Mika 4:3, 4.

Nawan sama o abi fu feele taki sama o kon puu den aini a osu pe den e tan, bika ala sama o abi den eigi osu. Den wooko di wi o du aini a ten de, a wooko di o meke u piisii. Beibel taki nawan sama aini a ten de o ‘wooko taanga fu soso’.​—Yesaya 65:21-23.

Beibel taki: ‘A leli fu Yehofa o fuu goontapu’ (Yesaya 11:9). Den sama di o tan aini a nyun goontapu o leli fa den mu du sani enke fa Yehofa, a Sama di meke u wani. Den o kon sabi den sani di Yehofa meke moo bun tu. Den ná o koboloiki a koni di Gadu gi den fu meke fetisani efuso taa sani di e du ogii anga taawan (Yesaya 2:4). Ala sama o leli fa den mu solugu a goontapu di Yehofa gi u.​—Psalm 37:11.

Di Gadu meke a goontapu, a meke en fu libisama sa nyan bun fu a libi fu teego (Psalm 37:29; Yesaya 45:18). Neen meke aini a ten di e kon, ‘Gadu o gwili dede’, a moo gaan feyanti fu u (Yesaya 25:8). Gadu paamisi wi aini Beibel taki: ‘Dede ná o de moo, nawan sama o tyali moo, sama ná o kee moo, pen seefi ná o de moo’ (Openbaring 21:4). Gadu o gi miliyunmiliyun libisama a okasi fu libi fu teego aini a ten di e kon.​—Yohanisi 5:28, 29; Toli fu den apostel 24:15.

 A nyun goontapu de koosube. Nownow, a miliyunmiliyun sama e teke seeka kaba fu tan aini a nyun goontapu ya. Fa den e du a sani ya? Winsi fa den sama ya abi sondu ete, toku den e meke moiti fu kon abi den manii di Gadu taki u mu abi. Den e meke moiti tu fu kon sabi Yehofa anga en Manpikin Yesesi Kelestesi moo bun.​—Yohanisi 17:3.

Meke moiti fu sabi san i mu du fi iseefi sa de aini a nyun goontapu di Gadu paamisi u. I sa akisi wan Yehofa Kotoigi fu sutudeli anga i sondee fu pai. Den o koboloiki a I sa piisii fu teego! buku fu sutudeli Beibel anga i.