‘Neen meke u mu de na ain, bika wi á sabi a dei anga a yuu.’​—MATEYESI 25:13.

‘U mu tan luku, u mu de na ain, bika wi á sabi on ten den sani ya o pasa.’​—MALIKISI 13:33.

Den tekisi ya e soi u taki wi á sabi on ten a kaba o kon. Ma Gadu poti ‘a dei anga a yuu’ kaba di a o poli a goontapu ya (Mateyesi 24:36). Ma winsi fa wi á sabi a dei anga a yuu, toku u poi sabi efu a kaba de koosube. Yesesi be taigi den bakaman fi en fu poti pakisei a wantu sani di be o pasa di a kaba be o de koosube.

Wantu sani be o pasa fosi a kaba doo. Yesesi be taki: ‘Foluku o go e feti anga denseefi, kondee o go e feti anga taa kondee. Nyanyan o pina. Seke-doti o go e pasa a omen peesi’ (Mateyesi 24:3, 7). A be taki siki be o go e paati a hii goontapu tu (Lukasi 21:11). Yu e si den sani di Yesesi be taki aini den tekisi ya e pasa nownow?

Dunsudunsu sama e dede aini feti, sama e dede fu angii, gaan seke-doti e kii omen sama, siki e paati a hii goontapu. Aini 2004, a doti be seke na a pisi fu a Indiya Se. A sani ya kii wan sani fu 225.000 sama. Aini wan pisiten fu dii yali, a COVID-19 siki kii moo enke 6.9 miliyun sama a hii goontapu. Yesesi be taki te u si den sani ya e pasa, da u mu sabi taki a kaba fu a goontapu de koosube.

Beibel e kai a pisiten fosi a kaba fu a goontapu ya, ‘den lasiti dei’ (2 Peitilisi 3:3, 4). Tu Timotiyesi 3:1-5 e soi taki aini den lasiti dei, sama á be o go e tyai denseefi bun moo. (Luku a faki ‘ Wantu sani di be o pasa fosi a kaba doo.’) Beibel taki sama be o abi takuudu, den á be o lobi taawan, a denseefi namo den be o go e denki. Ala den manii ya wi e si aini a ten ya.

On langa den lasiti dei o de? Beibel taki a wan satu pisiten namo wi o libi aini den lasiti dei. Baka dati Gadu o kii ‘den sama di e poli a goontapu’.​—Openbaring 11:15-18; 12:12.

Gadu poti a dei anga a yuu kaba di a o poli a ogii goontapu ya (Mateyesi 24:36). Ma a abi bun nyunsu gi u. Beibel taki Gadu ‘á wani nawan sama dede’ (2 Peitilisi 3:9). Neen meke ai gi libisama a okasi fu kengi den manii fu bigin du sani enke fa a wani. A wani ala sama fende a okasi fu doo aini a paladeisi di a paamisi u.

Gadu seeka sani fu ala sama sa yee a bun nyunsu fu a Kownukondee (Mateyesi 24:14). A omen miliyun yuu Yehofa Kotoigi e koboloiki fu leli sama sani fu a Kownukondee fu Gadu. Yesesi be taki a bun nyunsu ya be o paati a hii goontapu fosi a kaba kon.

Di a kaba fu a goontapu ya o doo, Gadu o puu ala libisama tiimakiti. Ma a paamisi u taki u sa pasa libilibi go aini a nyun goontapu. Aini a artikel di e kon, wi o luku san i mu du efi i wani de aini a nyun goontapu.