I POI leisi Beibel aini Hebrewtongo? Kande yu á poi. Kande yu á si wan Beibel aini Hebrewtongo ete seefi. Ma di yu o yee a toli fu Elias Hutter wan koniman di be e libi aini den yali 1600, anga den tu Hebrew Beibel fi en, yu o teke en fu bigi taki yu abi wan Beibel.

Elias Hutter meke aini a yali 1553 a wan pikin foto den e kai Görlitz a Doisilikondee. A peesi ya de koosube fu Polen anga Tyekiya Republiek. Hutter leli wantu tongo di den e taki a Asia na a Lutheran University di de a wan peesi den e kai Jena. A 24 yali namo a be abi di a toon professor fu Hebrewtongo aini wan foto den e kai Leipzig. A be wani leli sama, neen meke a sete wan sikoo a Nuremberg, pe sama be sa leli Hebrewtongo, Giikitongo, Lateinitongo anga Doisilitongo aini fo yali. A ten de taa sikoo á be de pe sama be sa leli den tongo ya aini fo yali.

Aini a yali 1587 Hutter sikiifi den buku fu Beibel di sama sabi enke a Gaandi Testamenti, aini Hebrewtongo. Den be e kai a Beibel ya Derekh ha-Kodes. Den puu a nen ya a Yesaya 35:8. A wani taki „a Pasi fu Santafasi”. A fasi fa a paati den vers anga den kapitel aini a Beibel ya, meke sama taki „ala sani fu a Beibel ya e soi taki a be de taa fasi”. Ma a sani di be e meke a Beibel ya pelensipali, na a leli di sama be sa leli Hebrewtongo anga a Beibel ya.

Efu u wani fusutan saide a Beibel fu Hutter abi wini, da u mu fusutan fosi san a den tu sani di be e taanga gi wan sama di be e leli Hebrewtongo. A fosi wan, Hebrewtongo nai sikiifi enke fa den tongo fu a ten ya e sikiifi. Du fu tu, son leisi den e sikiifi son sani na a Hebrew wowtu fesi efuso en baka. A sani ya e meke a taanga fu leisi efuso fusutan son wowtu. Wan fu den wowtu ya na a Hebrew wowtu נפשׁ (den e leisi a wowtu ya nefesj). A wani taki „sili”. Aini Eseikiyeli 18:4 a sani di sikiifi na a wowtu ya fesi na ה (ha). A sani ya wani taki „a”. Te i tyai den tu wowtu ya kon a wan, da ai toon הנפשׁ (han·nefesj), efuso „a sili”. Efu yu á sabi Hebrewtongo bun, i ná o sabi taki הנפשׁ (han·nefesj) anga נפשׁ (nefesj) na aseefi wowtu.

A fasi fa Hutter be doloki a Beibel ya be e yeepi sama di e leli Hebrewtongo. A be e sikiifi  a Hebrew wowtu anga fatu letter, da den wowtu di be e kon neen baka efuso neen fesi a be e sikiifi taa fasi. A sani ya be e yeepi den fu sabi sowtu Hebrew wowtu be moo pelensipali. A Nyun-Grontapuvertaling sikiifi den wowtu a ondoo fu den bladzijde na aseefi fasi. * A Hebrew wowtu seefi sikiifi anga fatu letter, da den taa wowtu di e kon neen fesi efuso neen baka sikiifi taa fasi. Den fowtow a tapu e soi fa a Hebrew Beibel fu Hutter sikiifi Eseikiyeli 18:4, anga san sikiifi na a maiki a ondoo aini a Nyun-Grontapuvertaling a Eseikiyeli 18:4.

Hutter be doloki a pisi fu Beibel di sama sabi enke a Nyun Testamenti aini 12 tongo tu. A doloki en aini a yali 1599 a Nuremberg. Sama lobi kai en a Nuremberg Polyglot. Hutter taki winsi a be de „kabakaba fu pai wan gaan moni” fu fende a Nyun Testamenti efuso den Giiki buku fu Beibel aini Hebrewtongo, a á be o fende en. * Neen meke enseefi poti den Giiki buku fu Beibel aini Hebrewtongo. A poti ala den taa wooko fi en a wan se, neen meke a be poi poti den Giiki buku fu Beibel aini Hebrewtongo aini wan yali.

Fa sama be e si den Giiki buku fu Beibel di Hutter poti aini Hebrewtongo? Aini a yali 1891 Franz Delitzsch, wan sabiman fu a Hebrewtongo be sikiifi taki: „A Beibel di Hutter sikiifi e meke i sabi fa den Kelesten fu fositen be e taki. A wan buku di yu abi fanowdu fu ondoosuku a tongo fu a ten de, bika a sikiifi enke fa den sama fu a ten de be e taki.”

Hutter á kon gudu fu a wooko di a du. Den buku fi en á be e seli. Ma a wooko di a du e yeepi sama te anga now. Wan man di den e kai William Robertson be kengi wantu sani na a Beibel fu Hutter, neen a doloki en aini a yali 1661 baka. Aini a yali 1798, wan taa man di den e kai Richard Caddick du aseefi sani. Di Hutter be e poti den Giiki buku fu Beibel aini Hebrewtongo, a be e poti „Yehofa” (יהוה, JHVH) a den peesi pe a be si Kyʹri·os (Masaa) anga The·osʹ (Gadu). A be e du a sani ya te a be si taki a Yehofa a tekisi e taki anga te a be si taki aini den Hebrewbuku fu Beibel den puu a tekisi. A sani ya bun fu sidon pakisei, bika a nen fu Gadu á sikiifi aini gaanse Beibel, ma a Beibel di Hutter sikiifi e soi taki a nen fu Gadu be de aini den fositen Giiki buku fu Beibel.

Son langa i si Yehofa, a nen fu Gadu aini den Giiki buku fu Beibel, i mu pakisei a taanga wooko fu Hutter anga den Hebrew Beibel fi en.