Wan buku taki tyali-ati „na a fii di wi e fii gi taawan. Te wi e pakisei fa u be o fii efu a wi wan sani be miti”. Wan ondoosukuman di den e kai Dr. Rick Hanson taki, „ala sama meke anga a fii ya”.

PAKISEI A SANI YA: Te i luku ala den sani di e libi, da saide a libisama moo abi a taanga fii fu soi tyali-ati gi taawan? Beibel taki Gadu meke libisama enke fa enseefi de (Genesesi 1:26). A meke wi anga denseefi fii di a abi anga den manii fi en. Neen meke te wan sama e yeepi taawan fu di tyali e kisi en, na a manii fu Yehofa, a Gadu di meke wi, ai soi.​—Odo 14:31.

Gadu e fii gi u. Ai hati en te a si fa wi e pina. Beibel e soi taki den Islayelisama be nyan pina di den be de enke saafu a Egepte. Boiti dati a libi á be makiliki gi den, di den be waka 40 yali aini a sabana. Beibel taki ’te sani be e moo den Islayelisama, da a be e du Gadu ogii’ (Yesaya 63:9). A ná sabi namo Yehofa be sabi taki den e pina, ma a be e hati en te a be e si fa den e pina. Yehofa taki: „Mi sabi fa den e pina” (Ekisodesi 3:7). Boiti dati a taki: „A sama di o holi u, e holi mi ain gaasi” (Sakaliya 2:8). Te taawan e du ogii anga wi, ai hati Yehofa.

Winsi wi e si enke wi á fiti fu Gadu soi tyali-ati gi u, toku Beibel e gi u taanga-siki fu biibi taki „Gadu bigi moo wi ati. A sabi ala sani” (1 Yohanisi 3:19, 20). Gadu sabi u moo enke fa u sabi useefi. A sabi san e miti u, san wi e pakisei anga fa wi e fii. Ai fii gi u tu.

 Beibel taki

• „Yehofa seefi o piki u te u kai en. Efu u bali suku yeepi neen, a o taki: ’Mi de ya!’”​—YESAYA 58:9.

• „’Bika mi sabi bunbun san mi abi a pakisei fu du gi u, a so Yehofa taki. Mi wani sani waka bun anga u, mi á wani ogii miti u, mi wani wi abi a fitoow taki sani o waka bun anga u aini a ten di e kon. U mu kai mi. U mu kon a mi. U mu begi mi, da mi o aliki u.’”​—YELEMIYA 29:11, 12.

• „Poti mi wataa ain aini a saka fi i di meke anga meti-buba baa. I teli den, neen i sikiifi den aini i buku.”​—PSALM 56:8.

A sabi di u sabi taki Gadu e fii gi u poi yeepi u te wi abi polobelema? Luku a toli fu Maria. A taki:

„A libi be taanga gi mi di kanker kii a boi fu mi di be abi 18 yali. A siki ya fooseli en tu yali langa. Mi ati be boon a Yehofa di a á kibii a boi fu mi fu a siki ya á kisi en anga di a á deesi en.

Sigisi yali baka di a sani ya pasa, mi taigi wan mati fu mi aini a kemeente fa mi e fii. Mi taigi en taki Yehofa á lobi mi. A aliki mi omen yuu langa anga pasensi. A á koti mi mofu. Di mi kaba taki, a soi mi 1 Yohanisi 3:19, 20. A tekisi ya be doo mi ati. Ape sikiifi taki: ’Gadu bigi moo wi ati. A sabi ala sani.’ A taigi mi taki Yehofa sabi den nowtu di e miti u.

Winsi fa a soi mi a sani ya toku mi ati á be kaba koo! Neen mi leisi Psalm 94:19. Ai taki: ’Te sani be e moo mi, a yu be e toosutu mi fu mi sa piisii baka.’ Mi be fii enke a mi den sikiifi a tekisi ya gi! Nownow a moo makiliki gi mi fu taigi Yehofa san a den booko-ede fu mi, bika mi sabi taki ai aliki mi. Ai fusutan mi tu.”

Wi e fende toosutu fu di u sabi taki Gadu e fusutan u. Wi e fii bun tu fu di u sabi taki ai fii gi u! Ma saide sama e pina so? A sitaafu Gadu e sitaafu u fu den ogii di u du? Gadu o puu pina? Wi o luku den toli ya aini den taa artikel.