Den fosi 60 miniti di wan pikin meke pelensipali gi a pikin. Saide? Te a pikin meke, a mu gwenti a mma aini den fosi 60 miniti, bika a sani ya e yeepi a pikin fu goo moo bun. *

San e yeepi wan mma fu solugu a potopoto pikin fi en anga en hii ati? Wan ondoosukuman di den e kai Jeannette Crenshaw sikiifi aini wan buku (The Journal of Perinatal Education) taki, wan hormoon den e kai oxytocine „e kon moo ipi aini wan mma sikin te a meke wan pikin. A sani ya e meke a mma moo lobi a pikin te ai holi en, te ai luku en anga te ai gi en bobi”. Wan taa hormoon „e yeepi a mma fu abi fii gi a pikin fi en”, ai yeepi en tu fu sabi san a pikin fi en abi fanowdu. Saide a bun fu poti pakisei na a sani ya?

A Yehofa Gadu meke wan mma anga en pikin e lobi denseefi so. * Kownu David be gi Gadu gaandi, bika a be sabi taki a Gadu be ’puu en aini en mma bee’. Boiti dati, a be e fii bun te en mma be e baasa en. A taki: „Fanafu di mi mma meke mi, a yu e solugu mi. Fanafu di mi de aini mi mma bee, a yu a mi Gadu.”​—Psalm 22:9, 10.

PAKISEI A SANI YA: Efu a Gadu poti a fii gi wan mma fu solugu en pikin anga en hii ati anga fu gi en san a abi fanowdu, da yu á si enke na aseefi fasi Gadu e booko en ede anga wi, di de enke ’en pikin’ tu noh?​—Toli 17:29.

Yesesi sabi a Gadu di meke ala sani moo iniiwan sama. Yesesi taki: „Den e seli tu pikin foo, wan tiisensi di ná abi yeepi. Ná so noh? Toku nawan fu den pikin foo ya e kai a doti, da u Dda á sabi. Ala den uwii a wi ede seefi a teli. Neen meke wi á mu feele, bika u pelensipali moo tyaipi pikin foo.”​—Mateyesi 10:29-31.

A wantu sama namo e poti pakisei a den pikin foo di e fee a tapu. Boiti dati gaanse sama nai poti pakisei seefiseefi te wan fu den pikin foo ya dede. Ma u Dda di de a hemel e poti pakisei na ala den pikin foo ya. Winsi fa den ipi toku den á pelensipali gi Yehofa enke wan libisama. A sani ya e soi taki ’u ná abi fu feele’, Gadu e booko en ede anga u.

 Beibel taki

• „Den ain fu Yehofa e si ala sani. Ai si den sama di e du bun anga den sama di e du ogii.”​—ODO 15:3.

• „Den ain fu Yehofa e si den sama di e libi a wan letifasi. Ai yee te den e bali kai en fu a yeepi den.”​—PSALM 34:15.

• „Mi o piisii fu di i soi bun-ati gi mi. Yu e si fa mi e tyotyo. I sabi san e miti mi.”​—PSALM 31:7.

U libi o waka taa fasi efu u sabi taki Gadu lobi u? Wi o fende wini efu u sabi taki ai booko en ede anga u? Eeye. Hannah * wan uman fu Ingiisikondee taki:

„Son leisi mi be e si enke Yehofa á lobi mi. Mi be e si enke a nai aliki te mi e begi en tu. Mi be e si enke a mi biibi swaki meke a á lobi mi. Mi e fii enke Gadu e sitaafu mi fu di mi á be pelensipali gi en. Mi be e si enke a nai booko en ede anga mi.”

Nownow Hannah e biibi taki Yehofa lobi en. San yeepi en fu si taki Yehofa lobi en? Hannah taki: „A saafisaafi mi kengi. Mi sabi ete taki omen yali pasa mi be yee wan lezing di e taki fu a dede di Yesesi kon dede gi u. A lezing ya yeepi mi fu biibi taki Yehofa lobi mi. Boiti dati te mi si fa Yehofa aliki den begi fu mi, da wataa e lon a mi ain. Bika mi e si taki Yehofa lobi mi tuutuu. Te mi e sutudeli Beibel anga te mi go a komakandaa mi e leli sabi Yehofa moo bun. Den sani ya e yeepi mi fu kon sabi den manii fi en anga a fasi fa ai booko en ede anga u. Mi e si fa Yehofa e holibaka gi u. Mi e si taki ai poti pakisei na ala sama tu.”

A sani di Hannah taki e gi u taanga-sikin. Ma fa yu o du sabi taki Gadu sabi fa yu e fii? Fa yu o du sabi taki ai booko en ede anga i? A taa artikel o piki den akisi ya.