A sikin di Gadu meke gi u, man deesi enseefi te wan sani du u. Te wan sani koti u, kaabu, efuso sutu u, da „a sikin e bigin seeka sani wanten fu deesi a soo, winsi a bigi” (Johns Hopkins Medicine). A sikin e seeka sani wanten fu koti a buulu, dee a soo, da a tapu a pisi fu a sikin de baka.

PAKISEI A SANI YA: Efu Gadu meke u sikin fu a man deesi enseefi, da yu á si enke a poi yeepi u te u de anga buduufu na ati noh? A psalm sikiifiman be taki: „Ai deesi den sama di booko-saka. Ai tei den soo fu den” (Psalm 147:3). Ma efu yu e kusumi fu di yu á poi feegete wan sani di be miti i noh? Fa Gadu o tei a soo fi i aini a ten ya? Fa a o deesi en aini a ten di e kon?

Gadu paamisi u taki: „Ná feele, bika mi de anga i. Ná booko yu ede, bika a mi a yu Gadu. Mi o meke yu abi deki-ati, mi o yeepi i” (Yesaya 41:10). Wan sama di sabi taki Yehofa e booko en ede anga en nai buuya. Ai fende kaakiti fu holidoo te tesi e miti en. Apostel Pawlesi be taki a fii ya na a „freide fu Gadu di libisama á poi fusutan”. A taki tu: „Mi poi du ala sani bika na a sama di e gi kaakiti e yeepi mi.”​—Filipisama 4:4-7, 9, 13.

Beibel e yeepi u fu biibi den sani di Yehofa paamisi taki a o du gi u aini a ten di e kon. Openbaring 21:4, 5 e taigi u san Yehofa o du. Ai soi u tu saide u sa biibi taki a o du en:

• „A o dee den wataa ain” fu libisama. Yehofa o puu ala den sani di e pina yu efuso di e gi i booko-ede, winsi taa sama nai poti pakisei a den sani de.

• Gadu, a sama di meke ala sani, sidon neen „Kownusutuu” a hemel. A o puu ala den sani di e pina u. A o yeepi u.

• Yehofa taki den sani di a taki „a ná lei. I sa fitoow den”. A o du den sani di a paamisi, efuso a nen di ai tyai fu a tuu Gadu o poli.

„’A o dee den wataa ain fu den. Da dede, tyali, kee anga pen ná o de moo. Bika den fositen sani pasa kaba. Neen a Sama di be sidon na a Kownusutuu taki: ’U luku! Mi e meke ala sani kon nyun.’ A taki tu: ’Sikiifi den sani ya, bika den sani ya, a ná lei. I sa fitoow den.’”​—Openbaring 21:4, 5.

Te u luku den sani di Yehofa meke anga te wi e leisi Beibel, da wi e si fa Yehofa Gadu de. Den sani di Gadu meke e soi u pikinso namo fa Gadu de, ma Beibel e meke u fusutan kiin taki Gadu wani wi anga en toon mati. A taki: „Kon koosube a Gadu, da enseefi o kon koosube a yu” (Yakowbesi 4:8). Toli 17:27 taki: „A á de faawe fu u.”

Efi i teke ten leli sabi Gadu, yu o moo biibi taki „ai booko en ede anga i” (1 Peitilisi 5:7). San a den wini di wi o fende te wi e biibi Yehofa?

Luku a toli fu Toru di e tan a Yapan. En mma a be wan Kelesten, tokuso a be go aini wan kulu fu wantu ogiiman a Yapan. Den e kai a Maafiya kulu ya yakuza. Toru taki: „Mi be e si enke Gadu e buuse mi. Neen meke mi be e si enke te wan sama di mi sabi dede, moomoo den sama di mi be lobi, da a Gadu be e sitaafu mi.” Toru taki a den mati di a be e waka anga den, anga a fii di a be e fii taki Gadu e buuse en, meke a toon wan sama di á be e fii gi taawan seefiseefi. A taki a sani di a be wani du ete, a fu kii wan sama di be abi balinen moo en, da a dede yonkuuyonkuu. A so a be o meke wan nen fika a baka.

Ma di Toru anga en uman Hannah, bigin sutudeli Beibel, neen Toru kengi en libi anga a fasi fa a be e denki. Hannah taki: „Mi be e si fa a kengi.” Toru taki: „Wan Gadu de di e booko en ede anga ala u. A á wani nawan sama dede. A de kabakaba fu gi sama paadon te den sani di den be e du e hati den. Ai aliki te wi e taigi en den sani di wi á poi taigi taa sama, anga den sani di nawan taa sama poi fusutan. Aini a ten di e kon, Yehofa o puu ala booko-ede, pina anga pen. Nownow ai yeepi wi a  wan fasi di wi á be denki. Ai booko en ede anga u. Ai yeepi u te u swaki.”​—Psalm 136:23.

Enke fa a toli fu Toru e soi, wi e fii bun te u sabi taki Gadu poi puu ala pina. Wi e fii bun te u sabi taki a o puu pina gi u. A o dee den wataa ain fu u. Wi e fii bun fa u sabi taki a á langa moo. Den sani di u sabi ya sa yeepi u fu abi wan bun libi aini a ten ya. Winsi fa u de aini wan goontapu di lai pina, wi e fende wini fu a booko di Gadu e booko en ede anga u.