Pakisei a fasi fa son toolengi * e fii gi denseefi. Den e fusutan denseefi bun. Wan uman den e kai Nancy Segal a wan dikitoo fu wan peesi pe den e ondoosuku a libi fu toolengi. Enseefi a wan toolengi. A taki: „Son leisi te wan fu den taki wan sani, da a taawan e fusutan wanten.” Wan uman taki fa en anga en toolengi sisa e fusutan denseefi. A taki: „U sabi ala sani fu useefi.”

Fa a du kon taki son toolengi e fusutan denseefi so? Ondoosukuman taki boiti a peesi pe den kiya anga den sama di kiya den, a moo gaan sani di e meke den e fusutan denseefi bun, a fu di den meke aseefi fasi.

PAKISEI A SANI YA: A sama di meke toolengi na a fasi ya, musu e fusutan a fasi fa ala u meke anga fa wi e fii, moo iniiwan sama. Neen meke a psalm sikiifiman David be taki: „A yu be kibii mi aini mi mma bee. I be e si ala den bon fu mi. Di i be e meke mi, taa sama á be sabi. . . . I be e si mi di mi be de aini mi mma bee. Fosi i meke mi, i be sikiifi aini i buku kaba fa ala den pisi fu mi sikin be o de” (Psalm 139:13, 15, 16). A Gadu wawan sabi fa u meke. Neen wawan man fusutan fa wi e fii. Neen wawan sabi ala den sani di miti wi aini u libi di meke u kon de enke fa u de nownow. A fasi fa Gadu meke wi anga a fasi fa a sabi wi e soi taki sama á de di e fusutan wi enke en.

David be begi taki: „Yehofa yu ondoosuku mi. I sabi mi. I sabi on ten mi sidon anga on ten mi opo taampu. I de faawe, ma toku i sabi san mi e pakisei. Yehofa, fosi mi opo mi mofu i sabi kaba san mi o taki” (Psalm 139:1, 2, 4). Yehofa sabi fa wi e fii. „A sabi san wi e pakisei” (1 Koloniki 28:9; 1 Samuweli 16:6, 7). San den tekisi ya e leli u fu Gadu?

Winsi wi á poi taki fa wi e fii efuso san wi e denki te wi e begi, tokuso Yehofa a Gadu di meke u nai luku namo san wi e du, ma ai fusutan saide wi e du son sani. Ai si den bun sani di u wani du, winsi wi á poi du den. A Yehofa poti a fii aini wi ati fu soi lobi, neen meke ai poti pakisei a den bun sani di de aini wi ati. Ai fusutan saide u wani du son sani tu.​—1 Yohanisi 4:7-10.

 Beibel taki

• „Den ain fu Yehofa e si den sama di e libi a wan letifasi. Den yesi fi en e yee den taanga begi fu den.”​—1 PEITILISI 3:12.

• Gadu paamisi taki: „Mi o meke i koni. Mi o soi i pe i mu waka. Mi o poti yu a pasi. Mi o luku yu.”​—PSALM 32:8.

A sabi di u sabi taki Gadu e fusutan wi anga a sabi di u sabi taki ai si san e miti u, e yeepi u te wi abi polobelema? Luku san be miti Anna, wan uman fu Nigeliya. A taki: „Te mi be luku den sani di miti mi, mi be e akisi miseefi saide mi de a libi. Mi man dede kaba. Mi be mu solugu a umanpikin fu mi na ati-osu, bika a be abi wan siki den e kai hydrocephalus (A siki ya e meke tyaipi wataa sidon aini a sama ede). Na aseefi ten de mi be yee taki mi abi kanker a mi bobi, neen meke dataa be mu koti mi. Den be mu gi mi deesi fu meke a kanker á goo moo. A be hebi gi mi bika mi anga mi umanpikin be de na ati-osu aseefi yuu.”

San yeepi Anna fu pasa a tesi ya? A taki: „Mi e sidon pakisei Beibeltekisi enke Filipisama 4:6, 7. Ape taki ’a freide fu Gadu di libisama á poi fusutan o kibii wi ati anga u fusutan’. Ala yuu te mi pakisei a tekisi ya mi e fii taki Yehofa á de faawe fu mi. Mi sabi taki ai fusutan mi moo fa mi e fusutan miseefi. Den baala anga sisa fu a kemeente e gi mi taanga-siki tu.

„Winsi fa mi á kaba betee, tokuso ai go moo bun anga mi anga a umanpikin fu mi. Fu di Yehofa e holibaka gi u, meke te den sowtu sani ya e miti u, u nai denki sani di sa meke u lasi-ati. Yakowbesi 5:11 taki: ’Wi e si den sama di holidoo enke koloku sama. U yee fa Yopu be holidoo. U si fa Yehofa meke en libi waka. U si taki Yehofa lobi sama tuutuu. A abi tyali-ati tu.’” Yehofa be sabi san e miti Yopu. Useefi sa biibi taki a sabi san e miti u.