„Pe Gadu be de?”
„MI E AKISI MISEEFI ALA YUU TAKI: PE GADU BE DE?”—Paus Benedict XVI, taki a sani ya di a be go a wan gaandi sitaafuman kampu a Auschwitz di de a Polen.
TE WAN GAAN OGII PASA, YU E AKISI ISEEFI ’PE GADU BE DE?’ WAN SANI PASA ANGA I KABA NEEN YU AKISI ISEEFI EFU GADU E BOOKO EN EDE ANGA I?
Kande yu e fii enke fa Sheila, di e tan na Ameekankondee be e fii. Den sama fu Sheila a be gaan kelikiman. Sheila taki: „A yonkuuyonkuu mi be wani dini Gadu, bika neen meke u. Toku mi á be e si enke mi anga Gadu a mati. Mi be e si enke Gadu be e si mi, ma mi á be e biibi taki ai booko en ede anga mi. Mi á be e si enke Gadu buuse mi, ma mi á be e si enke a lobi mi tu.” Saide Sheila be e denki so? A taki: „A baka makandaa ogii miti mi anga mi famii, ma a gei enke Gadu á be e yeepi u.”
Kande leti enke Sheila yu e biibi taki wan Gadu de di meke ala sani. Ma kande yu e akisi iseefi efu ai booko en ede anga i. Yopu a wan man di be e libi a wan letifasi. A be e biibi taki Gadu koni. A be e biibi taki Gadu abi makiti tu, ma toku a be e akisi enseefi efu Gadu e booko en ede anga en (Yopu 2:3; 9:4). Di omen ogii miti en baka makandaa, a be lasi howpu, neen meke a akisi Gadu taki: „Saide i daai baka gi mi? Saide yu e si mi enke i feyanti?”—Yopu 13:24.
San Beibel e taki fu a toli ya? A Gadu e meke ogii miti u? Sani de di e soi taki Gadu e booko en ede anga ala sama? Sani de di e soi taki ai booko en ede anga ibiiwan fu u? U poi sabi efu Gadu e poti pakisei a wi? U poi sabi efu ai booko en ede anga u efuso yeepi wi anga u polobelema?
Wi o si aini den taa artikel fa den sani di Gadu meke e soi taki ai booko en ede anga u (Romesama 1:20). Wi o si tu san Beibel e taki fu a fasi fa Gadu e booko en ede anga u. Yu o moo ’sabi Gadu’ te i luku den sani di a meke anga te yu e leisi a Wowtu fi en. Yu o moo biibi tu taki „ai booko en ede anga i”.—1 Yohanisi 2:3; 1 Peitilisi 5:7.
