Efu a ná Gadu e meke ogii e miti libisama, da saide angii, pina, oloku, takuu siki anga sani enke seke doti anga gaan winta de a goontapu? Beibel, a Wowtu fu Gadu, e taki fu dii sani di e meke libisama e pina:

1. Sama e denki denseefi namo, den abi takuudu, den e buuse taawan. „Fanafu di libisama bigin tii taa libisama, sani nai waka bun gi den” (Peleikiman 8:9). A omen sama e pina fu di sama di abi ogii-ati anga sama di e denki denseefi namo, e pina den.

2. Ogii ten anga sani di wi á poi si a fesi. Son leisi libisama e pina fu di „ogii ten anga sani di den á poi si a fesi e miti ala den” (Peleikiman 9:11). Son leisi sama e de a wan peesi na a yuu di ogii e pasa ape. Ongooku e miti sama tu. Boiti dati ogii e miti sama fu di den nai luku bun fosi den du wan sani anga fu di taawan e meke fowtu.

3. A ogii-ati tiiman fu a goontapu. Beibel e soi kiin san na a moo gaan sani di e meke wi e pina. A taki: „A hii goontapu de aini a makiti fu a ogiiwan” (1 Yohanisi 5:19). A „ogiiwan” a Saatan Didibii. Fosi a toon Saatan Didibii, a be wan engel fu Gadu, „ma a gwe fika a tuu” (Yohanisi 8:44). Taa engel waka a Saatan baka. Den e holibaka gi Saatan di e sitee anga Gadu. Den engel ya be e denki denseefi namo, a so den kon toon ogii yeye (Genesesi 6:1-5). Fanafu di Saatan anga den ogii yeye fi en gwe fika Gadu, neen den e du ala san den man fu meke ogii pasa a goontapu. Moomoo aini a ten ya. Ná pikin boon Didibii ati e boon nownow. „Ai koli sama a hii goontapu.” Na a sani ya meke Beibel taki „heelu fu goontapu” (Openbaring 12:9, 12). Saatan a wan ogii-ati tiiman. Ná pikin switi ai switi gi en te sama e pina. A Saatan e meke sama e pina, a ná Gadu.

PAKISEI A SANI YA: A wan sama di ná abi fii gi taawan efuso di abi ogii-ati wawan sa meke ogii miti sama di á du nawan sani. Gadu á de so. Beibel taki: „Gadu a lobi” (1 Yohanisi 4:8). A abi bun manii. „Noiti Gadu e du ogii. Noiti a Taanga Gadu e du sani di á bun!”​—Yopu 34:10.

Ma kande yu e akisi iseefi: ’On langa a moo taanga Gadu o fika Saatan, a ogii-ati tiiman, fu tii goontapu?’ Enke fa u be si kaba, da Gadu á lobi ogii seefiseefi. Ná pikin hati ai hati en te wi e pina. Boiti dati Beibel, a Wowtu fi en taki: „Fika ala den polobelema fi i gi en, bika ai booko en ede anga i” (1 Peitilisi 5:7). Gadu lobi u. A abi makiti tu fu puu pina. Boiti dati a o puu ala den sama di nai du sani a wan letifasi. A taa artikel o taki moo fu a toli ya. *