WINSI fa Adan anga Efa tyai sondu anga dede gi libisama, toku Gadu á kengi pakisei. A wani sama libi fu teego aini wan paladeisi a goontapu ete. A sikiifi a omen peesi aini en Wowtu Beibel, taki a o du san a be abi a pakisei.

• „Den sama di e libi a wan letifasi o fende a goontapu. A den o tan neen fu teego.”​—Psalm 37:29.

• „A o gwili dede fu alaten. A moo hei Masaa Yehofa o sibi a wataa-ain fu ala sama puu a den fesi.”​—Yesaya 25:8.

• „Dede na a lasiti feyanti, di a o puu a pasi.”​—1 Korentesama 15:26.

• „Dede ná o de moo, nawan sama o tyali moo, sama ná o kee moo, pen seefi ná o de moo.”​—Openbaring 21:4.

Fa Gadu o „gwili” efuso puu dede? Enke fa u be si kaba, da Beibel e soi taki ’den sama di e libi a wan letifasi o libi fu teego a goontapu’. Ma toku Beibel taki „nawan leti-ati sama de a goontapu, di e du bun ala yuu” (Peleikiman 7:20). Dati wani taki Gadu o pasa en mofu, da a meke sondu sama libi fu teego a goontapu? Nono, noiti Gadu o pasa en mofu, bika „Gadu . . . á poi lei” (Titesi 1:2). Da fa Gadu o du san a be abi a pakisei di a be meke libisama, bika ala sama a goontapu sondu.

Yehofa pai wan paiman fu fii libisama fu sondu anga dede. Te wan sama e pai wan paiman fu wan sani di lasi, da na aseefi sani efuso wan sani di e wegi aseefi enke a wan di lasi a mu gi fu pai a paiman. Ala libisama abi sondu, neen meke ala u be mu dede. Beibel taki: „Nawan fu den poi fii wan taa sama. Den á poi pai Gadu fu fii wan taawan. (A paiman di mu pai fu fii wan sama bigi. Neen meke noiti wan sama o poi pai en).”​—Psalm 49:7, 8.

Te wan sama dede, ai pai fi en eigi sondu, a á poi fii enseefi fu sondu anga dede. A á poi pai fu den sondu fu wan taa sama tu (Romesama 6:7). U be abi wan sama fanowdu di ná abi sondu. A sama ya be mu de kabakaba fu dede gi u fu pai fu den sondu fu u.​—Hebrewsama 10:1-4.

Na a sani ya Gadu du gi u. A sende en Manpikin Yesesi kon a goontapu enke wan libisama di ná abi sondu (1 Peitilisi 2:22). Yesesi taki a kon „fu gi en libi enke wan paiman fu fii omen sama” (Malikisi 10:45). A dede fu pai gi u fu u sondu fu wi á sa dede moo.​—Yohanisi 3:16.

Nownow a ’libi taanga’ leti enke fa Beibel be taki a fesi. A sani ya e soi taki wi e libi aini „den lasiti dei” fu a ogii goontapu ya (2 Timotiyesi 3:1). Den lasiti dei ya o kaba te Gadu o „kuutu den ogii sama, da a poli den” (2 Peitilisi 3:3, 7). Ma den sama di lobi Gadu o tan a libi te a sani ya o pasa. Gadu o gi den sama ya ’teego libi’.​—Mateyesi 25:46.

Miliyunmiliyun sama di dede o fende a okasi fu libi fu teego te den o kon a libi baka. Di Yesesi go a wan foto den e kai Nain, a weki a wan kodo boi fu wan uman di be dede. A uman ya man be dede kaba. Di Yesesi si a uman „tyali kisi en”, neen meke a weki a boi fi en baka (Lukasi 7:11-15). Apostel Pawlesi be taki: „Miseefi e biibi taki Gadu o weki den dedesama baka, den sama di be libi a wan letifasi anga den sama di á be libi a wan letifasi.” A howpu ya e soi kiin taki Gadu lobi libisama tuutuu.​—Toli 24:15.

 A omen miliyun sama abi a howpu fu libi fu teego. Beibel taki: „Den sama di e libi a wan letifasi o fende a goontapu. A den o tan neen fu teego” (Psalm 37:29). A ten de den o piisii tuutuu, den o si fa a sani di apostel Pawlesi be sikiifi wan sani fu 2000 yali pasa o kon tuu. A be sikiifi taki: „Dede yu á poi wini moo. Dede, pe i maka de?” (1 Korentesama 15:55) A ten de a moo gaan feyanti fu libisama ná o de moo!