San Beibel e leli u: „A fasi fa wi e libi mu soi taki wi á lobi moni. Ma u mu tifeedi anga san wi abi nownow.”​—Hebrewsama 13:5.

Aini a ten ya, a omen sani de di sama e si enke den musu fu abi namonamo. Tokuso Beibel e leli u taki u sa „tifeedi anga san wi abi nownow”. Fa wi o man du a sani ya?

Yu á mu „lobi moni”. Son leisi sama e poli anga den famii efuso den mati fu moni ede. Taawan e du sani di e tyai den gosontu go a baka efuso poli den bun manii fu den, fu di den „lobi moni” (1 Timotiyesi 6:10). A sani ya a wan don sani bika moni „nai sai” den sama di lobi gudu.​—Peleikiman 5:10.

Libisama pelensipali moo gudu. A tuu taki wi abi gudu fanowdu, ma gudu ná abi fii, neen meke den á poi lobi u. A libisama wawan poi lobi u. Te wi abi „wan tuutuu mati” wi e moo piisii aini a libi.​—Odo 17:17.

San Beibel e leli u: „Wan ati di e piisii a wan bun deesi.”​—Odo 17:22.

Piisii de enke wan „bun deesi” di sa yeepi i te i siki. San o yeepi i fu piisii te i siki?

Piisii anga den bun sani fu a libi. Efu wi e poti pakisei a den polobelema fu u, a o gei enke u „hii libi” a soso polobelema (Odo 15:15). Beibel taki a moo bun fu „soi taki yu e teke sani fu bigi” (Kolosesama 3:15). Meke moiti fu piisii anga den bun sani fu a libi, winsi fa den nyoni. Kande i lobi a fasi fa a san e dongo, fa a winta e wai efuso fa wan sama di i lobi e lafu. Poti pakisei a den sani ya, den o meke i fii bun.

Yeepi taawan. Winsi u siki toku wi o ’moo de koloku te wi e gi taawan sani moo enke te taawan e gi u sani’ (Toli 20:35). Te taawan e gi u daa fu den sani di u du gi den, a sani de e meke u fii bun. Ai yeepi u tu fu wi á poti pakisei a den booko-ede fu u. Useefi e fii bun te wi e yeepi taawan.

San Beibel e leli u: „Sabi san a den moo pelensipali sani.”​—Filipisama 1:10.

Efu toowpaa nai meke ten gi denseefi, a toowlibi fu den ná o waka bun. Man anga uman mu si a toowlibi fu den enke wan fu den moo pelensipali sani aini den libi.

Du sani makandaa. Suku sani di u sa du makandaa. Beibel e leli u taki: „Tu sama bun moo wan” (Peleikiman 4:9). U sa boli, du wan sport, kiin osu efuso diingi wan sani makandaa.

Soi yu uman efuso i man taki i lobi en. Beibel e gi toowpaa taanga-sikin fu lobi anga fu lesipeki denseefi (Efeisesama 5:28, 33). Lafu gi i toowpaa, baasa en efuso gi en wan kado. Den sani ya e meke i toowpaa si taki i lobi en. A yu toowpaa wawan too i mu poolo gi, yu á mu poolo gi taa sama.​—Hebrewsama 13:4.