A KONI Kownu Salomo be taki den sani di sikiifi a tapu ya wan sani fu wan dunsu yali fosi Yesesi kon a goontapu. Den sani di a taki e soi fa libisama e fii. U nai libi langa, ala sama sabi taki den o dede wan dei. Neen meke libisama e suku wan fasi fu libi moo langa. Den dunsudunsu yali di pasa a omen toli de di e soi fa sama e suku fasi fu libi moo langa.

Luku a toli fu wan kownu den be e kai Gilgames. Sama sikiifi omen anainsitoli fu a kownu ya. Wan fu den toli ya e soi taki a be go a wan faawe peesi fu suku wan fasi fu libi fu teego. A omen ogii miti en a pasi, ma a á fende a sani di a be go suku.

Wan sani fu 2000 yali fosi Yesesi kon a goontapu, wantu koniman fu China be puubei fu meke wan deesi di be o yeepi sama fu den libi moo langa, ma den á fende wini. Den be meke a deesi ya anga kwik anga wan taa sani den e kai arsenicum. Son sama taki a gei na a sani ya kii omen fu den tiiman fu China a fositen. A pisiten fu den yali 500 te anga 1500, koniman fu Europa be e meke moiti fu meke gowtu toon wan sani di sama man diingi. Den be wani du a sani ya fu di den be e biibi taki gowtu sa meke sama libi langa bika a nai poli.

Aini a ten ya, a omen koniman di e ondoosuku a sikin fu libisama e meke moiti fu sabi saide libisama e kon gaandi. A sani ya e soi taki te anga a dei fu tide sama e meke moiti fu fende wan fasi fu tapu a gaandi di wi e gaandi anga a dede di wi e dede. Ma fa sani waka?

Den koniman di e ondoosuku a sikin fu libisama kai moo enke 300 sani di e meke wi e gaandi. Aini a ten ya, koniman meke deesi di e yeepi den cel fu meti anga den cel fu libisama fu libi moo langa. Neen meke guduman e gi den koniman ya moni fu den ondoosuku saide wi e dede. San den kon si di den du den ondoosuku ya?

Koniman e suku wan fasi fu sama sa libi moo langa. Son koniman di e ondoosuku libisama sikin e biibi taki wan fu den sani di e meke u gaandi, na a fasi fa den telomeer (a ede-se fu den chromosoom) e wooko. Chromosoom a wan pisi fu wan cel. Te wan cel e paati fu meke nyunwan, da a telomeer e solugu taki a nyun cel de aseefi enke den gaandiwan. Ma ala leisi te wan nyun cel meke, a telomeer e moo satu. Te fu kaba, da a cel nai poi meke nyunwan moo, a so sama e bigin gaandi.

 Aini 2009 den gi wan uman den e kai Elizabeth Blackburn wan kado fu a wooko di a du. A uman ya anga den sama di e wooko anga en be kon si taki wan sani den e kai enzym de aini u sikin di e meke den telomeer á satu gaw tumisi. A sani ya e yeepi den cel fu den á gaandi gaw tumisi. Ma a ondoosuku fu den e soi tu taki den telomeer á poi meke u libi moo langa.

Koniman e kengi sani aini den cel fu di den wani tapu a gaandi di wi e kon gaandi. Te son cel fu u sikin gaandi tumisi fu meke nyun cel, da den sa sende falisi bosikopu go a den taa cel fu u sikin di e meke u nai siki lawlaw. A sani ya e meke wi e siki moo makiliki. Son peesi fu u sikin sa hati u tu. Taade ya ondoosukuman fu Faansikondee teke wantu cel fu gaandi sama di pasa 100 yali, neen den kengi sani aini den cel ya. Jean-Marc Lemaître, a fesiman fu den ondoosukuman ya, taki a ondoosuku fu den e soi taki den poi kengi sani aini wan cel fu meke a kon yonkuu baka.

A omen koniman taki winsi fa omen fasi de fu yeepi sama fu den á gaandi, tokuso libisama á poi libi langa moo enke fa wi e libi nownow. A tuu taki fanafu a pisiten fu den yali 1800 te anga now, sama nai dede gawgaw so moo, enke fa den be e dede fosi. Sama e libi pikinso moo langa fu di den kon sabi fa den sa holi denseefi kiin fu den á siki, fu di dataa fende deesi di e yeepi sama fu den á siki lawlaw, anga deesi di e yeepi sama fu betee te son siki kisi den. Son koniman e biibi taki libisama á poi libi langa moo enke fa den e libi nownow.

Wan sani fu 3500 yali pasa, a Beibel sikiifiman di den e kai Mosesi be taki: „Wi e libi 70 yali. Efu u taanga u sa doo 80 yali. Ma den yali ya lai booko-ede anga pina. Den e pasa gaw. Fosi i denki wi á de ya moo” (Psalm 90:10). Winsi fa koniman meke moiti fu fende wan fasi fu sama libi moo langa, tokuso wi e si taki a sani di Mosesi be taki a tuu.

Wi enke libisama nai libi langa, ma son koo e libi moo enke 150 yali. Son sedeebon anga taa bon e libi omen dunsu yali. Te i maiki wi anga den meti anga bon di e libi langa, kande yu e akisi iseefi taki: ’A 70 efuso 80 yali namo u meke fu libi?’