MEKE u taki yu e luku wan felon fu wan balinen futubali man di i lobi. Kande a felon e soi di a be yonkuu, fa a be e leli pee bal. Te a kon bigi yu e si fa ai pee gi wan gaan team. Bakaten ai go a wan taa kondee go pee gi wan moo gaan team. Ma te a felon e kaba, yu e si fa ai kon gaandi, te fu kaba a dede.

Den sowtu felon ya a ná anainsitoli, ma a sani di e pasa tuutuu. Winsi a be wan balinen singiman, koniman, sportman efuso wan taa balinen man, na aseefi fasi a toli be o kaba. A omen sani den balinen man ya e du, ma pakisei den somen sani di den be sa du ete efu den á be dede efuso kon gaandi.

A wan tyali sani, ma na a sani ya e miti ala sama (Peleikiman 9:5). Winsi san libisama du, den á poi puu a gaandi di wi e gaandi anga a dede di wi e dede. Boiti taki wi e dede fu di u kon gaandi, ongooku sa miti u, siki sa kii u tu. A leti enke fa Beibel taki, „u de enke dow di e de fu wan pisiten namo, ma baka dati i nai si en moo”.​—Yakowbesi 4:14.

Fu di iniiwan dei a dei fu u dede, meke son sama e pakisei taki „meke u nyan diingi, bika tamaa wi o dede” (1 Korentesama 15:32). Den sama di e libi na a fasi ya e si enke howpu á de. Kande i nai libi enke den sama ya, ma toku te son sani e miti i, kande yu e akisi iseefi taki: ’A disi na a libi kaba?’ Pe u sa fende a piki fu a akisi ya?

A omen sama aini a ten ya e si enke koniman sa fende a piki fu a akisi ya. A tuu taki son sani di koniman anga dataa kon sabi e yeepi u fu libi pikinso moo langa. Son koniman e meke moiti ete fu fende wan fasi fu u libi moo langa seefi. Ma winsi den be o fende wan fasi fu yeepi sama fu libi moo langa, toku u mu fende a piki fu den akisi ya ete: Saide wi e gaandi da wi e dede bakaten? Howpu de gi den sama di dede? Den taa artikel o taki fu den toli ya. Den o yeepi u fu sabi a piki fu a akisi ya tu: A disi na a libi kaba?