Saide wi e kon gaandi da wi e dede?
Gadu á be meke libisama fu e dede. Adan anga Efa, u fosi mma anga dda á be abi nawan sondu di Gadu be meke den. Den be sa de a libi te anga a dei fu tide. A sani di Yehofa be taigi Adan fu wan fu den bon aini a dyali Eden e soi taki den be sa libi fu teego.
Gadu be taigi Adan taki: „A dei di yu o nyan [a sii fu a bon] . . . , yu o dede namo” (Genesesi 2:17). Efu Gadu be meke Adan fu gaandi da a dede, da a sosokaali a be taigi en a sani ya, na so noh? Adan be sabi taki efu a á be nyan a sii fu a bon ya, a á be o dede.
GADU Á BE MEKE LIBISAMA FU E DEDE
Adan anga Efa á be abi fu nyan a sii fu a bon ya fu be man tan a libi, bika a omen taa sii be de aini a dyali di den be sa nyan (Genesesi 2:9). Efu den á be nyan a sii fu a bon, Adan anga Efa be o soi taki den e aliki Gadu, a Sama di meke den. Den be o soi tu taki den e si Gadu enke a sama di mu taigi den san den mu du.
SAIDE ADAN ANGA EFA DEDE?
Fu man fusutan saide Adan anga Efa dede, meke u luku san be pasa aini Eden. A sani ya abi fu du anga ala libisama. Saatan Didibii be koboloiki wan sineki fu meke wan lei. Beibel taki: „Fu ala den busimeti di Yehofa Gadu meke, a sineki be e luku bun fosi a du wan sani. Neen a sineki taigi a uman taki: ’A tuu taki Gadu taigi u taki wi á mu nyan den sii fu ala den bon di de aini a dyali?’”—Genesesi 3:1.
Efa piki a sineki taki: „U sa nyan den sii fu ala den bon di de aini a dyali. Ma Gadu taki fu a bon di de a mindii fu a dyali taki: ’Wi á mu nyan a sii fi en, wi á mu holi a bon seefi, efuso wi o dede.’” Neen a sineki taigi en taki: „U ná o dede seefi, bika Gadu sabi taki a dei di wi o nyan a sii fu a bon, wi ain o opo, wi o kon de enke Gadu, wi o sabi san bun anga san ogii.” Saatan be wani soi taki Yehofa a wan leiman di be e kibii bun sani gi Adan anga Efa.—Genesesi 3:2-5.
Efa biibi san Didibii taigi en. A teke ten luku a bon. Den sii be moin gi en, neen meke a teke wan fu den sii fu a bon, neen a nyan. Beibel taki: „Bakaten a gi en man a sii fu nyan tu, di den tu man be de makandii. Neen a man seefi bigin nyan.”—Genesesi 3:6.
Gadu taigi Adan taki: „A dei di yu o nyan en, yu o dede namo.”—GENESESI 2:17
A be musu hati Gadu di den pikin fi en taangayesi en fu seefi. San a du di a sani ya pasa? Yehofa taigi Adan taki: „Yu o . . . daai go baka na a doti pe mi be teke i puu. Bika a doti mi be teke meke i, da a doti yu o toon baka” (Genesesi 3:17-19). „Ala anga ala Adan libi 930 yali neen a dede” (Genesesi 5:5). Di Adan dede a á go a hemel, a á go a yeye kondee tu. Fosi Yehofa be teke doti meke Adan, a á be de a nawan peesi. Neen meke di a dede, a doti a toon baka. A á go a nawan peesi. Moo so tyali sani á de!
FA A DU KON TAKI WI ABI SONDU?
Di Adan anga Efa taangayesi Gadu, den toon sondu sama, den lasi a howpu di den be abi fu libi fu teego tu. Ma a ná den wawan fii a bakapisi fu a sani di den du. Ala den pikin fu den toon sondu sama tu. Romesama 5:12 taki: „Wan man [Adan] meke sondu de a goontapu, neen sondu tyai dede. Neen meke ala sama e dede, bika ala den abi sondu.”
Beibel taki sondu de enke wan ’koosi di e dombii ala sama, anga wan duku di beei lontu ala den foluku’ (Yesaya 25:7). A de enke somoko di e kii sama. Wi á poi kibii gi en. A leti enke san Beibel taki, „Adan meke ala sama e dede” (1 Korentesama 15:22). Neen meke u wani sabi a piki fu a akisi di apostel Pawlesi be poti. A be taki: „Sama o yeepi mi anga a sikin ya di e tyai mi go kii?” Wan sama de di sa yeepi u?—Romesama 7:24.
