NOWNOW a goontapu á de enke fa Gadu be abi a pakisei. A goontapu be mu fuu anga sama di e si Gadu enke a sama di mu tii den. Libisama be mu e wooko anga den weiti fu Gadu, den be mu abi denseefi manii di Gadu abi. Den be mu e libi switi anga denseefi, meke pikin, leli nyun sani. Boiti dati den be mu meke a hii goontapu toon wan paladeisi.

• „A o tyai wan kaba kon a feti na ala se fu goontapu.”​—Psalm 46:9.

• „A ten doo fu kii den sama di e poli a goontapu.”​—Openbaring 11:18.

• „Nawan sama di e tan ape o taki: ’Mi siki.’”​—Yesaya 33:24.

• „Den sama di mi teke o fende wini fu a wooko di den du.”​—Yesaya 65:22.

Fa den polofeititoli ya o kon tuu? Gadu poti en Manpikin Yesesi enke Kownu a hemel fu tii goontapu. Beibel e kai a tiimakiti ya a Kownukondee fu Gadu (Daniyeli 2:44). Beibel taki fu Yesesi taki ’Gadu o gi en a kownusutuu, da a o tii enke Kownu’.​—Lukasi 1:32, 33.

Den wonduu di Yesesi du di a be de a goontapu e soi kiin taki te a o tii enke Kownu, ala sani o go bun a goontapu.

• A deesi ala sowtu siki fu soi taki te a o tii, sama ná o siki moo.​—Mateyesi 9:35.

• Di a basi a se, a soi taki te a o tii sani enke gaan winta anga seke-doti ná o du ogii anga sama moo.​—Malikisi 4:36-39.

• A gi omen dunsu sama nyanyan fu soi taki te a o tii, libisama o fende san den abi fanowdu fu tan a libi.​—Malikisi 6:41-44.

• Di a meke wataa toon win a wan toow, a soi taki a o yeepi libisama fu piisii fu a libi.​—Yohanisi 2:7-11.

Fa i sa fende a libi di Gadu seeka gi den sama di lobi en? Wan „pasi” de di i mu waka fu fende a libi ya. Beibel taki „a doo di e tyai sama go a teego libi nyoni, a pasi fi en sumaa, a wantu sama namo e fende en”.​—Mateyesi 7:14.

San na a pasi di e tyai sama go na a tuutuu libi? Gadu taki: „Mi a Yehofa, a mi ai Gadu. A mi na a sama di e leli i san i mu du fu sani waka i bun. A mi na a sama di e soi yu a pasi di i mu waka” (Yesaya 48:17). Efi i waka na a pasi di Gadu e soi i, i libi o waka bun.

 Yesesi be taki: „A mi na a pasi, a tuu anga a libi” (Yohanisi 14:6). Efu wi e du san Yesesi be taki neen u waka neen baka, wi anga Gadu o toon mati. A sani ya o yeepi u fu abi wan moo bun libi.

Fa i sa fende a pasi di e tyai sama go na a tuutuu libi? A omen keliki de, ma Yesesi be wasikoi u taki: „A ná ala sama di e kai mi ’Masaa, Masaa,’ o go aini a Kownukondee fu hemel, ma na a sama di e du san mi Dda di de a hemel wani, o go aini” (Mateyesi 7:21). A taki tu: „A den sii di den e meke, o meke u sabi sama a den” (Mateyesi 7:16). A Beibel sa yeepi i fu sabi sowtu biibi na a tuu biibi.​—Yohanisi 17:17.

Fa i sa bigin waka na a pasi di e tyai sama go na a tuutuu libi? I mu meke moiti fu sabi a Gadu di meke ala sani: Sama neen? Fa den e kai en nen? Sowtu manii a abi? San ai du gi u nownow? San a wani u du? *

Gadu á wani libisama wooko, nyan, pee anga meke pikin namo da a kaba. A wani u leli sabi en fu wi anga en toon mati. U sa soi en taki u lobi en te wi e du san a wani. Yesesi be taki: „Efu wan sama wani libi fu teego, da a mu sabi yu, a tuutuu Gadu.”​—Yohanisi 17:3.

Te wi o kon sabi san Gadu wani u du, kande wi o abi fu kengi a fasi fa wi e libi. Kande a gei enke a sani ya taanga fu du, ma te wi o bigin waka na a pasi di e tyai sama go na a tuutuu libi, u libi o moo waka bun. Efi i wani sabi den moo pelensipali sani fu Gadu, Yehofa Kotoigi sa kon leli i san sikiifi aini Beibel na a yuu anga a peesi di moo bun gi i. Efi i wani miti u i sa go a www.pr418.com/djk.