Senten di Gadu meke libisama neen ai koboloiki engel anga polofeiti fu taki anga u. Boiti dati, a meke sama sikiifi ala san a wani u du poti a pampila. A meke den sikiifi den sani di a paamisi u tu. A paamisi u taki sani o go bun aini a ten di e kon. Fa u sa sabi san Gadu paamisi wi aini a ten ya?

Ala den sani di Gadu wani u sabi, sikiifi aini Beibel (2 Timotiyesi 3:16). Fa Gadu meke den polofeiti sikiifi a buku ya? (2 Peitilisi 1:21) Gadu poti a bosikopu fi en aini den man ya fusutan, neen den sikiifi en poti a pampila. A leti enke te wan basi fu wan wookope, meke wan sama sikiifi wan biifi gi en. Winsi fa na a sama sikiifi a biifi, toku den pakisei di sikiifi aini a fu a basi. Na aseefi sani Gadu du tu. A meke wantu man sikiifi a bosikopu fi en poti aini en Santa Buku.

A bosikopu fu Gadu pelensipali, neen meke a seeka sani fu ‘sama fu ala nasi, lo anga tongo’ yee a bosikopu ya. A wani den fusutan san a bosikopu ya wani taki tu (Openbaring 14:6). Nownow a hii Beibel, efuso son pisi fi en de aini moo enke 3000 tongo. Nawan taa buku a goontapu de aini so ipi tongo.