Efu a san á be de, libi á be o de a goontapu. Na a kaakiti fu a san e meke den bon kengi uwii, neen e meke den gi boomiki anga sii tu. Na a san e gi den bon kaakiti fu hali wataa teke anga den lutu, da a paati gi den taka anga den uwii. Baka dati a san e dee a wataa baka.

Alen a wan fu den kado di Gadu gi u. Na a sani ya e meke den sani di u paandi goo fu u sa fende sani fu nyan. Gadu poti wan ten pe nyanyan e de pasa maiki. Neen meke wi e piisii.

A omen dda e meke moiti fu gi den pikin fu den nyanyan anga koosi fu wei. Ma a Wowtu fu Gadu e taki: ‘Luku den foo di e fee a tapu bun. Den nai paandi efuso puu nyanyan a goon poti aini magisin, ma tokuso u Dda di e tan a hemel e gi den nyanyan. Wi á bun moo den noh?’​—Mateyesi 6:25, 26.

‘Luku fa den leiliboomiki e goo aini den wei. Den nai wooko, den nai meke koosi, ma mi e taigi u taki Salomo sowan gendee kownu seefi, á be e wei moin enke den boomiki ya. Efu Gadu e meke den sani di e goo aini den wei, e wei moin so . . . , da yu á si enke a o poi gi wi di abi pikinso biibi koosi fu wei noh?’​—Mateyesi 6:28-30.

Efu Gadu poi yeepi u fu fende nyanyan anga koosi, da u sa biibi taki a o yeepi wi anga den taa sani di wi abi fanowdu tu. Efu wi e meke moiti fu du sani enke fa Gadu wani, a o yeepi u fu den sani di wi e paandi goo. A o yeepi u tu fu fende wan wooko di o yeepi u fu bai san wi abi fanowdu.​—Mateyesi 6:32, 33.

Te u luku a san, a alen, den foo, den boomiki anga den taa sani di Gadu meke, da a sani ya e meke u lobi en. A taa artikel o soi fa Gadu e taki anga libisama.